“Euskaldunon aktibazioa” lantzeko asmoarekin ‘Hizkuntza aktibismorako’ tailerra prestatu du datorren larunbaterako Euskal Herrian Euskaraz erakundeak. Durangoko Ibaizabal ikastolan burutuko den ekimeneko gidaria TELP ikastaroen sortzailea den Gemma Sangines izango da.
EHEk hainbat proiektu jarri ditu martxan Euskal Herri euskalduna gauzatzeko eta jarritako helburuak erdiesteko “pausu bat harago egin behar” dutela aitortzen dute. Horien artean Altsasun, Iruñean eta Arrasaten ‘Hizkuntza aktibismorako’ egindako hiru tailerrak eta asteburu honetan Durangon egingo den laugarrena.
Azken tailer honetan “euskaraz bizi nahi eta ahalegina egiten dugun herritarroi, hizkuntza praktika sumisoak gainditzeko baliabide pertsonalak” eskainiko dira, EHEren esanetan. Halaber, “baliabide hauek kolektiboki landu eta garatzeko, eta bestelako arlotan aldaketak eragiteko, dinamikak jarriko dizkigu eskura”.
Tresna eraginkorra
Ekimen hau “aurrerantzean tresna eraginkorra izan eta hedapen zabala izango duela” uste dute eta hausnarketa prozesuaren ondorioekin tresna berria uztartzeko asmoa agertu dute.
Tailer hau ‘Izan, egin, eragin. Euskal Herrian Euskaraz’ hausnarketa prozesu parte-hartzailearen ondorioetako bat da eta helburua “euskaldunok bizi dugun hizkuntza gatazkaren korapiloak askatzeko gakoak identifikatzea da”. Gainera, EHEren etorkizuna marraztuko duten neurriak hartzeko baliogarria izango da.
Tailerra 25 pertsonentzat mugatuta dago eta bertan egoteko beharrezkoa da aldez aurretik izena ematea durango@euskalherrianeuskaraz.org posta elektronikoan edo 655719539 telefonoan. Parte hartzeko 10 euro ordaindu behar dira.
Cargando...
