Kriskitin dantza taldekoak jantzi tipikoekin desfilean
Dantza, kanta eta musika saio erraldoi batekin ospatuko dute Kriskitin dantza taldekoek beraien 25. urteurrena larunbat honetan. Andra Mariako elizpean gogoratuko dute burututako ibilbidea taldearen erakusgarri izango diren zenbait ikuskizun eta dantza emanaldi eskainiz.
25 urte igaro dira Kriskitin taldea sortu zenetik, ibilbide guzti honetan Durangaldeko belaunaldi ezberdinetako hainbat neska eta mutil igaro dira bertatik Euskal Herriko dantzak ikasteko. Hasierako helburuari jarraituz, Kriskitin taldeak ideia berritzaileak bereganatu ditu, betikotasuna baztertu barik; ildo berriak jorratuz eta kulturartekotasuna landuz.
Burututako ibilbidean zehar izandako bultzadak eskertzekotan eta bizitako 25 urte osasuntsuak ospatzeko antolatzen ari diren ekitaldien artean larunbat honetakoa izango da egunnik handiena.
Dantza, kanta eta musika saio erraldoia
Larunbat honetan, ekainak 30, Andra Mariako elizpean dantza, kanta eta musika saio erraldoia eskainiko du Kriskitin dantza taldeak bere 25. Urteurrena ospatzeko.
Ekintzetan lehengo eta oraingo dantzari, musikari, zein abeslariek hartuko dute parte; guztira ehun dantzaritik gora izango dira taula gainean, 15 musikariren doinuekin lagunduta.
Saioaren aurkezpena Xeberri bertsolari eta bikoiztaile durangarraren eskutik etorriko da. Kristina Mardaraz, hasierako garaietako bertsolariak ere agerraldia egingo du. Hauekin batera dantza taldearekin eskutik joan diren Borogoroditsie eta Doiñu Zahar abesbatzetako 20 bat kantarik ere hartuko dute parte.
Dantza eta musika ekitaldiekin batera, 25 urteoako ibilbidea gogoratuko duten ikuskizunak ere eskainiko dituzte: ‘Berrasi’ espektakuluarekin hasi eta ‘Muntxaraz’, ‘Kriskitinaren hotsa’, ‘Amillanpetik’ eta ‘Aup’ikuskizunekin jarraituko dute, gaur egunraino jorratutako ibilbidea erakutsiz. Bertan belaunaldi guztietako dantzari eta musikariek hartuko dute parte, baina brotxea gaur egungo dantzari eta musikariek jarriko dute.
Saio guztiak doakoak izango dira eta bertaratzen direnentzako eserlekuak egongo dira.
DURANGON. Durangoko albisteak
