1200 lagunetik gora bilduko dira zapatuan Kurutziaga ikastolaren
50. urteurreneko bazkarian

Durangoko Kurutziaga ikastolak 50. urteurrena ospatuko du zapatuan Landako gunean eta egun osorako prestatutako egitarauan jolas, ikuskizunak, musika eta 1200 lagun bilduko dituen bazkaria tartekatuko dira.

Eguneko egitaraua goizeko 10:30etik 14:30era Landako gunean jarriko diren puzgarriekin eta 12:00etan Plateruenan eskainiko den ‘Ane eta Piratekin parrandan’ ikuskizunarekin hasiko da.

12:30etik 14:30era ‘Kurutziagatik Kurutziagara’animazioarekin girotuko dituzte Durangoko kaleak. Eginkizun horretan bi musika talde eta ikastolako hankapaluak eta konpartsak parte hartuko dute. Han-hemenka ibiliko diren taldeak gune desberdinetatik irtengo dira; bata Kurutziaga kalean dagoen Kurutzesantu museoaren paretik aterako da, ikastola sortu zen gunetik hain zuzen, eta bestea gaur egungo Kurutziaga ikastolatik aterako da.

14:30etik aurrera 1200 lagunetik gora Landako gunean bilduko dituen bazkaria eta horren ostean egingo den Urteurreneko ekitaldia izango dira eguneko ekitaldi aipagarrienetakoak. Ospakizunari amaiera emateko Luhartz taldeak girotutako erromeria egongo da 17:00etatik aurrera.