Oinezkoentzako zirkulazioa errazteaz gain, 43 aparkaleku sortuko dira Ogenbarrena auzoan

Amorebieta-Etxanoko Udalak Ogenbarrena auzoko urbanizazioaren 3. fasea atera du lizitaziora 1.347.000 eurotan, BEZa barne. Egitasmo horren bidez, Ogenabekoa eta Gudari kaleen artea urbanizatuko da eta 43 aparkaleku berri egingo dira Ixerangon.

Ogenabekoa eta Gudari kaleko zatian urbanizatzeko obrak “oinezkoentzako hiri-espazioaren balioa handitzea ekarriko du”, Udal arduradunen arabera.

Proiektuaren helburua oinezkoentzako zirkulazioa erraztea da eta horretarako  espaloien zabalera handituko da, oztopoak eta zintarriak kenduko dira eta oinezkoen ibilbideak berdinduko dira.

Gainera, erabilera-espazioak handituko dira, eta landaredi eta zuhaitz elementu txikiak sartuko dira, auzoko gainerako eremuekin homogeneizatzeko.

43 aparkaleku berri

Lanak osotzeko, argiak, hustubide-elementuak, saneamendua eta drainatzea, instalazio-sareak berritzea eta edukiontzien eta aparkalekuen eremua jarri eta antolatuko dira.

3. faseak Ixerango kalean 43 aparkaleku berri egitea ere aurreikusten du. Proiektu gauzatzeko beharrezkoa izango da gaur egun dagoen espaloia eraistea, espaloi-lerro berri bat zintarri eta akaberekin egokitzea, eta kanpoko aparkaleku bat egitea galburu moduan, asfaltatua. Era berean, aurreikusita daude, baita ere, egun dauden argiak birkokatzea eta hustubidea, saneamendua eta drainatzea.