Udalak zuzenean kudeatuko du Plateruena eta martxoaren 3an jarriko du berriro martxan

Durangoko Udalak bere gain hartuko du Plateruena kafe antzokiaren kudeaketa eta 2023ko martxoaren 3an hasiko da “modu ofizialean Plateruena berriaren ibilbide berria”, Udal ordezkariek adierazi dutenez. Udalak, Maider Larrañaga aukeratu du Plateruenako arduradun.

Hala ere, 2020ko abenduan ateak itxi zituen aretoak, aurtengo Gabonetan hasiko da berriro martxan, “programazio xume eta herrikoia” antolatzen ari baitira Udal arduradunek herriko elkarte eta eragile ezberdinekin. Horren ostean, erritmoa aste batzuek jaitsiko da eta barne lanak zehaztuko dituzte.

Kudeaketa aldaketa garatzeko, 313.000 euroko diru-atala bideratu du Udalak 2023ko aurrekontuetatik, Ane Abanzabalegi eta Patxi Lakuntza zinegotziek aretoan bertan eskaini duten prentsaurrekoan adierazi dutenez.

Plateruenaren itxieraren ostean Udalak egindako diagnostikoaren ondorioz, bi kudeaketa eredu aztertu zituen: “kudeaketa lehiaketa publikora atera eta berau enpresa edo elkarte pribaturen baten esku uztea, ala Durangoko Udalak kultur eskaintzaren kudeaketa bere gain hartzea”, Abanzabalegi eta Lakuntzaren arabera.

Hiru oinarri

Gobernu Taldeak zuzeneko kudeaketaren aldeko apustua egin du, izan ere, “zerbitzu publikoak indartzeko hautua egin genuen gobernura heldu ginenean”. Gainera, “enpresa edo elkarte pribatu baten eskuetan uzteak”, ez zituen bermatzen Plateruena berriarentzat ezarritako hiru oinarriak, hau da, “Durangoren euskalduntzean laguntzea; herriko elkarte eta eragileei aterpea eskaintzea; eta euskal kulturgintzako sortzaileen plaza garrantzitsua izatea”.

Kudeaketa zuzena egingo den arren, udal ordezkariek ‘Kultur Mahaia’ elkargunea sortuko dute “herriko eragile ezberdinek parte hartu ahal izateko. Kultur Mahai horren helburua, haien iritzi eta eskaerak modu ahalik eta horizontalenean kudeatzea izango da”. Izan ere, “Plateruena moduko espazio batek erabilera asko izan ditzake eta durangar guztien iritziak ezagutu nahi ditugu”, Abanzabalegi, Lakuntza eta Larrañagaren esanetan.

EAJren salaketa

Durangoko Euzko Alderdi Jeltzaleak, “kudeaketa eredua alde bakarretik erabakitzea salatu du” kaleratutako prentsa oharrean. Gobernu taldeak hartutako erabakia, “udalbatzako gainerako kideekin eztabaidatu gabe eta inolako gardentasunik gabe” hartu dela kritikatzen dute.

“Gobernu-talde honek harritu egiten gaitu haren gardentasun eta informazio faltarekin”, Mikel Ortega EAJ-PNVko zinegotziak deitoratu zuenez. Izan ere, “gure eskaera eta ekarpenen erantzuna prentsan aurkitu dugu”.

Jeltzaleek “lankidetza publiko-pribatuko eredu baten aldeko apustua” berresten dute, ez dakitelako Gobernu Taldeak aukeratutako zuzeneko kudeaketa-ereduak “zer ekarriko dion Durangori eta Udalaren beraren kultura-jarduerari”.