Fede Bosch kataluniarraren kartelak iragarriko du aurtengo Durangoko Azoka

Kataluniatik dator Durangoko Euskal Liburu eta Disko Azokaren 45. edizioa iragarriko duen kartelaren egilea. Aurten 49 kartel aurkeztu dira lehiaketara eta Fede Bosch diseinatzailearen lana aukeratu du epaimahaiak. Kartelean, disko-jogailu zahar eta liburu baten irudiekin jolastu du egileak, ???azokaren bi elementuen batergarritasuna uztartu nahian???.

Abenduaren 4tik 8ra ospatuko den Durangoko Euskal Liburu eta Disko Azokaren 45. edizioa iragarriko duen kartela ezagutzera eman du gaur Gerediaga Elkarteak. Bartzelonako Fede Bosch diseinatzailea izan da lehiaketaren irabazlea.

Laugarrenez lehiaketa bidez aukeratu dute Durangoko Azokaren berri emango duen irudia eta aurten 49 lan aurkeztu dira. Gerediaga Elkartetik azpimarratu duten bezala, hautetatik 10 bat kartel Durangaldekoak izan dira.

Halaber, aurtengo edizioaren lehiaketa irabazteagatik, 1.300 euroko saria eskuratu du Bosch-ek. Egileak aurkezpenean adierazi duenez, ???azokaren bi elementuen batergarritasuna uztartu nahi izan ditut, irakurri eta musika entzun biak batera egin daitezkeela erakusteko???.

Izan ere, aurtengo Azoka iragarriko duen kartelean, disko-jogailu zahar baten irudia erabilita, ???tradizio handiko ekimena adierazteko aukera izan dut ere eta disko antzera liburu jarrita poesia bisual txikia lortu nahi izan dut???, azpimarratu du egileak.

Tio Pepe etxearen marka

Diseinu grafikoa ikasketak egin zituen Bosch-ek eta freelance ibili da lanean, soldatapeko beste lan batekin uztartzen duen bitartean. 2003. urtean Tio Pepe etxearen marka berrirako lehiaketa irabazi eta diseinugintzari ekitea erabaki zuen. Harrezkero, Bartzelonako publizitate enpresetan lan egin du.

Halaber, 2007an San Fermin jaietako karteletan finalista izateaz gain, Diario de Navarra egunkariko irakurleen gustokoena aukera zuten bere lana. Iaz, berriz, Getxoko marka turistikoa aukeratzeko lehiaketan finalista izan ezezik, Debako Kultur Elkartearen 50. urteurreneko logotipo lehiaketan irabazlea ere izan zen.

Bestalde, Pedro Mari Basañez arkitektoa eta Arte Ederren Fakultateko irakaslea, Ismael Iglesias artista plastiko durangarra, Javier Garcia de la Torre arkitektoa eta Txaro Berriozabalgoitia, Gerediaga Elkarteko bazkidea den epaimahaia osotu dute aurten.

DURANGON. Durangoko albisteak