Olinpiadak? Gainera mundialak!

Atzoko gazte bazkariaren digestioa egin orduko, koadrilen arteko Olinpiadak hasi ziren Pinondo inguruan. Eta prestatutako probak sekulakoak izan ziren, nahiz eta bigarren lehiari ekin eta berehala baten batek atsedena eskatu “noiz da erlaxatzeko unea?” galdetuz.

Deitura xelebredun hamasei talderen partaidetzarekin (Limontzelo, Yoyasak, Putin-n semeak, Urtzulo sin futuro, Titiriteroz de Zebaztopol, -1H Kanariasen, Komando Butch!!!, Gometxak, Tukutuak, Ebolikoak, Zapafetuek, Goien, Gaztelurrutia Ardaue, Qvelcom, Birubiruaa eta Albertxi), zaila zan taldekideak nortzuk ziren jakitea, guztien kamisetak berdin-berdinak zirelako eta esaldi berarekin: ‘Guztiok batera, susterretik lorera’. 

Aurtengo gaia ‘Oestea’ izan bazen ere, cowboy gutxi eta indioarena egiteko gogo ugari ibili zen Pinondo inguruan. Gehienak jokoen arauei eutsi beharrean azpijokoa nahiago zuten. Azken finean lehiatzea baino garrantzitsuagoa zen irabaztea… edo ahaleginak egitea behintzat.

Prestatutako jolasak ere, zerikusi gutxi zuten urruneko mendebaldearekin, nahiz eta aproposak izan une barregarriak eragiteko. Lehenengoan partaide bakoitzak bere taldekidea aurkitu eta elkarrekin jesarri behar zuen; eta ohikoena biek hankaz gora amaitzea zen.

Jolasak

Bigarren jolasean partaide bakoitzak, makila txiki bat ardatz zuela, zazpi buelta eman behar zituen; baina zirudien bat-batean zenbatzen ahaztu zitzaiela edo iruzur egiteko gogo gehiago zutela. Ondorengo protagonismoa zakuek hartu zuten, lehenengo belarrez betetako zakua bikoteka jaurtitzeko eta ondoren zaku berean sartutako sei lagunek lasterketa egiteko.

Amaieran denak nekatuta; batzuk egindako ahaleginagatik eta besteak egindako barreagatik. Baina hori bai denak parrandan jarraitzeko prest.