Trikitilari jaialdia izango da lehenengoz Amatzako San Martin jaietan

Iurretako Amatza auzoko San Martin jaiak ospatuko dituzte asteburuan eta aurten, lehenengo aldiz, trikitilari jaialdia antolatu dute, agerraldian sei bikote izango direla. Prestatutako egitarauan auzoko dantzarien ekitaldiak, karten eta tortilla txapelketak eta bertsolarien saioa ere izango da.

San Martin jaiak ostiralean arratsaldeko zazpietan igoko duten txopoarekin hasiko dira, ekitaldia auzoko soinulariek alaituko dutela. Jarraian, azken entseguri ekingo diote dantzariek eta iluntzeko zortzietan lehenengo Trikitixa jaialdia hasiko da. Agerraldian Ansorregi eta Larrañaga, Harkaitz Allur eta Miren Errasti, Elizagoien ahizpak, Landa eta Antxitte, Lierni Aranburu eta Mireia Ibabe eta Izer eta Lutxurdio bikoteak igoko dira agertokira. “Bakoitza bere maleta zikuegaz” egindako afariekin osatuko da eguneko egitaraua.

Larunbatean ospatuko duten San Martin eguna, Mozorro eguna izango da eta goizeko 10.30ean abiatuko den trikitilarien kalejirarekin ekingo diote egitarauari. Ordu erdi geroago meza nagusia hasiko da eta elizkizuna amaitzerakoan luntxa egongo da.

Iluntzeko 20.30ean tortilla txapelketan lehiatzen diren tortillen aurkezpena egingo da eta jarraian afaria hasiko da. Afalostean bertsolarien ekitaldia eta Txomin Berdarrak taldeak girotutako erromeria egongo da.

Igandeko ekitaldiak trikitilariek kalejirarekin hasiko dira 10.30ean eta ordu erdi geroago meza nagusia egongo da. Honen ostean auzoko dantzarien ekitaldia eta luntxa izango dira. San Martin jaiak bazkari herrikoiarekin eta bazkalostean izango diren karta lehiaketa eta igel txapelketarekin eta umeen jolasarekin osatuko dira.