Elorrioko talde eta bakarlarien saioak izango dira bihar Kainaberaren jaialdian

Azken urteetan egin duen bezala, aurten ere Elkartasun Jaialdia antolatu du Elorrioko Kainabera elkarteak eta bihar Arriola Antzokian egingo den ekitaldia herriko talde eta bakarlarien agerraldiekin osatuko da. Borondatezko sarrerekin lortutako dirua, Bogotako jantoki komunitarioetara bideratuko du ekitaldia antolatzen duen Gobernuz Kanpoko Erakundeak.

Arratsaldeko 17.00etan hasiko den Elkartasun Jaialdia Kainaberaren urteko azken ekitaldia da eta bertan Elorrioko ikastetxe, musikari eta dantza taldeek parte hartuko dute. Egitarauan Besaide Dantza Taldea, Bixente Beitia, Elorioko txistulariak, funky taldeak, Lourdesko Ama ikastetxeko DBHko ikasleak, Plazako dantzak ikastaroko kideak eta +Que Cuerdas musika taldea tartekatuko dira.

Elkartasun jaialdiarekin lortutako diru etekinak Bogotako Ciudad Bolivarren dagoen El Recuerdo auzuneko jantoki komunitarioetara bideratuko dute. Leku menditsu horretako biztanle gehienak, %95a gutxi gora behera, Kolonbiako hainbat bazterretatik gatazka armatuaren eraginez desplazatutako pertsonak dira.

El Recuerdoko biztanleek “elikadura eta nutrizio arazoei aurre” egin behar diete Kainaberako kideen esanetan eta horretarako jantoki komunitarioak sortu zituzten 2006an. Jantokietan 250 pertsona ingururi ematen zaie zerbitzua, eta oinarrizko elikadura bermatzeaz gain, inguruko familiei formazio saioak ere ematen zaizkie.

Jantokien proiektu honetan buru-belarri dihardu Kainaberaren sorreratik GKEren bidelagun den Manolo Martinez abadea, komunitateko emakumeekin elkarlanean.