Iurretako EH Bilduk herriko kirol instalazioen erabilera arautzeko ordenantza eskatu dio Udalari

Iurretako EH Bilduk herriko kirol instalazioen kudeaketaren aurrean Udalak erakutsitako “izugarrizko utzikeria” dela eta, behar beharrezkoa ikusten du “herriko kirol instalazio guztien erabilera arautuko duen ordenantza bat” gauzatzea. Gainera, Udal Gobernuari aholkatzen dio ez dadila erori “partxe bat egiteko tentaldian” eta arazoari errotik heltzea eta konpontzea eskatzen dio.

Ezker abertzaleko taldeak kaleratutako ohar baten zabaldu duenez, “ez gaitu sorpresaz harrapatu Larrakozelai futbol zelaiaren harira herriko kirol talde biren artean sortu den liskarra”, adierazten da.

Talde honek “kirol instalazioen erabilerari buruzko datuak eskatu” zizkion Udal Gobernuari eta, hainbat aldiz galdetu ondoren, “sorpresa jaso genuen herriko kirol instalazioen erabilera arautzeko inolako ordenantzarik (ez eta idatzizko hitzarmenik ere) ez zegoela esan zigutenean”.

EH Bildutik onartu egiten dute Iurreta herri txikia dela baina “gure txikitasunean hainbat kirol instalazio ditugu: Olaburu Pilotalekua, Larrakozelai futbol zelaia, eta Juan Orobiogoitia ikastetxearena den arren Iurretako udalak kudeatzen duen kiroldegia”.

Ekipamendu horietan “herriko kirol klubek egiten duten lana errazteko eta babesteko” beharrezko dela uste dute instalazio guztien erabilera arautzea. Horretarako, “erabiltzaile ohikoenak diren kluben adostasuna bilatzeko bideak ireki beharko lituzke udalak”.

Talde honen arabera instalazio guztiak “erabilgarri egon behar dira, lehenik, herriko kirol elkarte guztientzat, eta ondoren gainontzeko herritar guztiontzat”.