Asteburuan egingo da aurten 48 ordu iraungo dituen Zap’Ing film laburren lehiaketa

Laugarren edizioa beteko duen Zapi’Ing ekimenak, 24 orduren ordez 48 orduko lehiaketa izango da. Ekimen honetako parte hartzaileek gehienez zortzi minutuko iraupena duen pelikula laburra egin behar dute.

Ekimenean parte hartzeko beharrezkoa da izena ematea apirilaren 7a orduko zapaburukonpartsa@gmail.com helbide elektronikoan. Lehiaketa barikuan hasiko da, arratsaldeko 16:00etan, Plateruena Kafe Antzokian zein emailez, Facebook edo Twitterren bidez ezagutzera emango diren oinarrien azalpenekin.

Oinarrietan, edizio honetarako aukeratutako gaia, pelikulan derrigorrez agertu behar den objektua eta tartekatu behar den esaldia emango dira ezagutzera.

Pelikula bakoitzak zortzi minutuko iraupena izango du gehienez eta Plateruena  Kafe Antzokian entregatu behar da domekan, arratsaldeko 16:00ak orduko. Filmak MPEG edo AVI formatuan egon behar dira eta pendrive edo memoria baten entregatu behar dira.

Aurkeztutako filmen emanaldia arratsaldeko 18:00etan izango da eta ondoren sari banaketa egingo da.

Antolatzaileen arabera Zap’ing ekimena ‘lehiaketa’ da, baina zentzu berria eman nahi diote hitzari “kontsumitzaile izatetik  sortzaile izateko”  eta “aisialdiaren protagonista” izateko hain zuzen. Horretarako, “konfort gunetik” atera beharko dira partaideek, “lotsak eta beldurrak gainditzeko eta “sorkuntza armairuko kaxa ezkutuak zabaltzeko”.

Iazko ediziora zazpi lan aurkeztu ziren eta irabazlea ‘Esan’ filma izan zen.