Durangoko EH Bilduk pertsona nagusien parte hartzea eta pentsio duinak bermatu nahi ditu

Durangoko EH Bilduk, martitzenean zahartzaro aktiboaren inguruan antolatu zuen hitzaldian, jende nagusiari buruzko programako 15 puntuak aurkeztu zituen. Bertan, bizi-baldintza eta pentsio duinak eta gizartean parte hartzeko eskubidea defendatzen dituzte.

Pertsona nagusien bizi-baldintza duinak bermatzeko asmoz, integrazio sozial eta komunitarioa helburu izango duen zaintza eta laguntza politikak ezarri nahi dituzte, baita oinarrizko zerbitzuak eta garraio publiko sarea auzoetara eramatea ere.

Datorren legegintzaldian 1.080 eurotako gutxieneko pentsioaren alde egingo dutela azpimarratu du EH Bilduk. Horrekin batera, urratsak eman nahi dituzte euskal pentsio sistema “propio eta duina” lortzeko. Bereziki “pobreziara kondenatzen” dituzten pentsionisten diru sarrerak osagarritu eta elikadura-, osasun- eta energia-pobrezia egoerei urgentziazko eta lehentasunezko erantzunak emanez.

Parte hartze handiagoa

Pertsona nagusien autonomia eta bizitza aktiboa sustatzea ere izango dute helburu. Nagusiek parte hartzeko dituzten eremu formalak bultzatu eta berrikusi nahi dituzte, eragiten dizkieten politiketan paper aktiboa izateko. Baita nagusien artean eremu sozialeko taldeak eta bolondres lanak sustatzea ere, herriko elkarte eta eragileen ezagutzarako jardunaldiak antolatuz.

Horretaz gain, pertsona nagusiek eremu ezberdinetan jendarteari egiten dioten ekarpena ikusarazi nahi dute, bereziki “ikusezinak diren” emakume nagusien ekarpena.