Gaur hasi eta martitzenera arte iraungo duten Mañariko Andra Mari jaiak, adin eta gustu desberdinetarako ekitaldiak iragartzen dituzte. Ospakizunak Penny Fleck taldeak gaur 20:00etan eskainiko duen kontzertuarekin hasiko dira eta martitzenean amaituko dira Mozorro eguna eta paella lehiaketarekin.
Domekan egingo den Pitxitxiren igoera eta Rafa Bizkarra eta Lurdes Gorrotxategik piztuko duten txupinazoarekin hasiko dira ospakizunak. Suziria 13:00etan piztuko dute eta ondoren herri-bazkaria egongo da. Bazkalostean, igel eta mus txapelketak, haurrentzako zirko tailerra eta gazte olinpiadak egongo dira. Musikak beteko ditu eguneko azken orduak, Iheskide, Nikotina eta Dupla taldeen kontzertuak egongo baitira 22:30etik aurrera.
Astelehenean ospatuko den Andra Mari eguna goizeko 7:00etan egingo den plaza inguruko garbiketarekin eta 10:00etan txistulariek eskainiko duten kalejirarekin abiatuko da. Ordu bete geroago Kirikiño abesbatzak lagundutako meza egongo da, eta ostean, dantzarien agerraldia.
Munduko herrialdeak
Eguerdian, pilota partiduak egongo dira, afizionatu zein profesionalen artean. Lehenengoan, Ait. Bernaola eta Ain. Bernaolak Inunziaga eta Bereinkua izango dituzte aurrez aurre, eta bigarrenean PeñaII-Uriondo bikoteak Zubizarreta eta Arangurenen kontra jokatuko dute.
Arratsaldean, haurrentzako herri kirolak, betiko jolasak eta karabina jaurtiketa egongo dira, eta 19:00etan Hika teatrok eta Oinkari Dantza Taldeak elkarlanean sortutako ‘Gazte’ ikuskizuna eskainiko dute. Ondoren, txistorrada egongo da eta 22:30ean Mikel Urdangarinen kontzertua hasiko da.
Martitzenean ospatuko den Mozorro egunerako aukeratuko gaia ‘Munduko herrialdeak’ izango da. Egitaraua, 11:00tako mezarekin eta osteko dantzarien ekitaldiarekin abiatuko da. Eguerdian, paella txapelketa hasiko da eta 18:00etan briska txapelketari emango diote hasiera. Barrunba elektrotxarangaren ekitaldiarekin eta Pitxitxiren igoerarekin emango diote amaiera aurtengo jaiei.
Cargando...
