Bere herriaren eta herrikideen babes osoa eta bultzada izango du bihar Aitor Elordi pilotari mallabitarrak, Nafarroa Arenan jokatuko duen binakako txapelketa nagusiaren finalean. Batzuk, autobusez joango dira Iruñera, eta beste batzuk, herrian prestatu diren ekitaldietan parte hartzeko aukera izango dute.
Mallabiko Pilota Eskolak egun osorako jardunaldi berezia antolatu du. Iruñean izango den finalera joateko, Mallabitik 11:00etan abiatuko den autobusa prestatu dute. Mallabian gelditzen diren herritarrek ere kirol jaiarekin gozatzeko aukera izango dute, eguerdiko 12:30etatik aurrera egingo den trikipoteoarekin hasita.
Ondoren, bazkari autogestionatua egingo dute frontoian, eta partida hasi aurretik, 15:30etatik 17:00etara, animazioa egongo da haur eta helduentzat. 17:00etatik aurrera Nafarroa Arenako pilota jaialdia jarraitzeko aukera egongo da, Mallabia I.a pilotalekuan ipiniko duten pantaila erraldoian. Lehenengo partida, Ezkurdia-Rezusta eta Jaka-Albisu bikoteek jokatuko dute, eta ondoren Laso-Imaz eta Elordi-Zabaletaren arteko finalarekin disfrutatzeko aukera izango da.
Eguna amaitzeko, afaria egingo da Herriko Tabernan eta ongi etorria egingo diote Aitor Elordiri.
Pilotari mallabitarrarentzat lehen mailan jokatzen duen lehenengo finala izango da. Zabaletarekin osatzen duen bikoteak aurreko domekan lortu zuen txartela, Altuna III.a eta Tolosaren kontra Bilbon jokatutako finalerdian. Aspeko enpresakidekin izandako norgehiagokan, atzelari gipuzkoarra lesionatu egin zen, Altuna eta bera markagailuan 19-15 aurretik zirela.
Cargando...
