Amorebieta-Etxanoko Udalak bizkaiera lantzeko ikastaroa antolatu du estreinakoz, eta urriaren bigarren hamabostalditik urtarrilera arte iraungo duen ekimena 100 ordu ingurukoa izango da.
Ikastaroaren helburua “euskaldun zaharrei zein euskaldun berriei bizkaiera erabiltzera animatzea eta zornotzarren artean euskarazko sareak osatzea da”, Udalaren Euskara Zerbitzutik adierazi dutenez. Horrela, “euskaldun zaharrei euskara gaitasuna hobetzeko aukera” eskaini eta “euskaldun berriei, berriz, bizkaierara hurbiltzeko bidea” erraztuko zaie.
Bizkaiera lantzeko ikastaroa antolatzea “euskaldun berri zein euskaldun zaharren aspaldiko eskaera da”, Euskara Zerbitzutik jakinarazi dutenez: Izan ere “euskaldun berriek euskara batutik herriko hizkerara hurbiltzeko beharra dute, euskaldun zaharrekin integratzeko, eta horretarako oinarrizko azalpen batzuk behar dituzte. Euskaldun zaharrek, berriz, herriko hizkera darabilte, baina arau gramatikalen inguruan inork ez die ezer erakutsi orain arte, eta askotan ez dakite zer den zuzena eta zer ez”.
100 ordu
Ikastaroa 100 ordu ingurukoa izango da, guztira, ordu eta erdiko zazpi saio egingo baitira bi asterik behin. Bertan, oinarrizko nozioak ikasiko dira, herritar arruntak erakartzeko eta euren artean sarea osatzeko.
Ikastaroa doakoa da, hala ere, izena ematea beharrezkoa da eta bihartik irailaren 29ra arte apuntatu daiteke esteka honetan.
Bestelako argibiderik behar duenak Euskara Zerbitzuren 946300002 telefonora deitu dezake (120 eta 121 luzapenak), edo euskara@amorebieta.eus posta elektronikora idatzi.
Cargando...
