Asteburu honetan burutuko den egitarau berezia prestatu du Elorrioko Udalak abenduaren 3an ospatzen den Euskararen Egunaren harira. Antzerkia, bertsoak eta Fanfarrixo txarangak girotuko duen lasterketa herrikoiarekin osatuko da egitaraua.
Euskararen Egunaren inguruan prestatutako egitaraua barikuan abiatuko da ‘Ghero’ antzezlanaren emanaldiarekin. Agerraldia Arriola Antzokian izango da, 20:30etan hasita.
Agertokian azaltzen diren Mikel Martinez, Patxo Telleria, Olatz Ganboa, Iñaki Maruri eta Ane Pikaza aktoreak euskararen planetaren inguruan orbitatzen duten bederatzi istorio eskainiko dituzte, Jokin Oregiren zuzendaritzarekin eta Telleria beraren dramaturgiarekin.
Zapatuan eskainiko den ‘Ez da kasualitatea’ bertso-saio musikatua Gaztetxean izango da, 19:30ean hasita. Ekitaldian Uxue Alberdi, Maider Arregi, Maialen Akizu eta Nerea Elustondo bertsolariak arituko dira, Gari Otamendi eta Itziar Etxegia izango dira musikariak eta gaiak Aissa Intsaustik jarriko ditu. Saioan umorea, jolasa, gogoeta, emakumeen arteko konplizitatea, musika eta bertsoa uztartuko dira.
Domeka eguerdirako prestatutako ‘Urratsak euskaraz konpleju barik’ IV. korrikaldiarekin osotuko da egitaraua. Lasterketa 12.00etan abiatuko da Herriko plazatik eta partaideei mozorrotuta joatea eskatu zaie. Gainera, Fanfarrixo txaranga izango da ingurua girotzen.
Cargando...
