Bozketa fasean sartu da Abadiñoko aurrekontu parte-hartzaileen prozesua. Herritarrek aurkeztutako proposamenen bilketa eta bakoitzaren azterketa teknikoa egin ondoren, abadiñarrek 32 proiekturen artean sei proiektu zerrendatu beharko dituzte. Abenduaren 27ko 11:00ak arte izango dute bozkatzeko aukera.
Aurtengo prozesuan banaketa egin du udalak, proiektuen aurrekontuen araberakoa. Alde batetik, 15.000 euro arteko aurrekontuak dituzten proiektuen zerrenda bat dago, hamahiru proposamenek osatua; eta, bestetik, 100.000 euro arteko aurrekontuak dituzten hemeretzi proiektuen beste zerrenda bat.
Abadiñarrek zerrenda bakoitzeko hiru proiektu zerrendatu beharko dituzte, sailkapenaren araberako hurrenkerarekin (1 zenbakia esleituko diote gehien gustatzen zaien proiektuari, 2a bigarrenari eta 3a hirugarrenari). Guztira sei boto emango dituzte, eta herritarrek bozkatzen dituzten proposamen guztien artean, 15.000 eurora arteko proiektuei 30.000 euro bideratuko dizkie udalak, eta 100.000 bideratuko zaizkio beste zerrendako proposamenei.
“Bozkatzera animatzen dugu”
Aldaketa honen helburua da aurrekontu txikiagoa duten egitasmoei txikiei ere bide ematea.Toki hauetan bozkatu dezakete herritarrek: Udaletxean, Traña-Matienako udal bulegoan, Errota Kultur Etxean, Mediatekan, online.
Mikel Urrutia alkateak bozketan parte-hartzera animatu ditu herritarrak: “Iazko parte-hartzea ona izan zen, baina orduan adierazi genuen bezala, kopuru hori handiagoa izatea gustatuko litzaiguke, legegintzaldi honetan pauso sendoak ematen ari garelako herritarren parte-hartzean. Bozkatzera animatzen dugu, uste baitugu denon artean lan eginda eraiki nahi dugun Abadiño errealitate bihurtzeko biderik onena dela. Bide batez, eskerrak eman gura dizkiegu proposamenak aurkeztu dituzten herritar guztiei, denak gauzatzeko aukerarik izan ez arren, zertan lan egin dezakegun ideia bat izateko balio digulako”.
Edurne Maguregik alkateordeak aurkeztutako proiektuen aniztasunaz hitz egin du: “Aurkeztu diren proposamenak denetarikoak dira, herrian dauden adin, talde, eta sektore desberdinetako pertsonei begirako proposamenak daude. Uste dugu prozesu honek lagunduko digula herri bezala zertan jorratu behar dugun ikusten, baina ezinbestekoa izango da herritarren parte-hartzea”.
Cargando...
