Baserriko produktu eta artisauen 35 postu jarriko dituzte ospatuko den Otxandioko azokan

Otxandioko Kementsu elkarteak antolatutako Baserriko produktuen azoka egingo da gaur. Aurtengoa 15 edizioa izango da eta bertan baserriko produktuek erakutsiko dituzten 20 postu inguru zein artisauen 15 postu jarriko dituzte.

Otxandioko erdialdean jarriko diren postu gehienak, ohikoa denez, inguruko baserritar eta ekoizleek jarritakoak izango dira. Bertaratzen diren bisitariek zer-ikusi eta zer erosi ugari izango dute, antolatzaileek “eskaintza zabala” egongo dela baieztatu baitute.

Jarriko diren postuetan baserriko produktu eta fruituk nagusi izango badira ere, landarak, Idiazabal gazte-egileren hiru saltoki, txerriki ekoizleen stand pare bat eta eztia, euskal pastela, ogia edo gozogintzako hainbat postu egongo direla baieztatu dute antolatzaileek. Landetatik etorritako pate egilea edo Arratiako pasata ekoizle bana ere bertan egongo dira.

15 artisau postu inguru egongo dira bertan eta era desberdineko eskulanez gain, bitxigileak zein ukendu eta krema egileek ere euren produktuak jarriko dituzte.

Goizean zehar kale animazioa ere egongo da eta antolatzaileek Gaztetxeko kideen zein herritarrek prestatutako sorpresak espero dituzte. Gainera, lehen sektorea bultzatzeko helburuarekin Eusko Jaurlaritzak sortutako Nirea ekimenak, haurrei baserriko baloreak transmititzeko tailerra izango dute etxeko gazteenek.

Bi motatako herri kirolen ekitaldiak izango dira eguerdian. Alde batetik, harri-jasotzaile txapelketaren final erdia jokatuko da eta bestalde, Urrezko aizkoraren kopako txapelketa erdia jokatuko da.

Eguneko egitaraua, Chapito Guzman taldeak arratsaldeko 17.00etatik aurrera girotuko duen erromeriarekin osatuko da.