Berriz, Durango eta Elorrioko Udalek bat egin dute Emakumeen Mundu Martxarekin

Durangoko Bilgune Feminista eta Andereak elkarteek osatzen duten Durangoko Plataforma Feministak hainbat ekitaldi prestatu ditu larunbatean herrira iritsiko den Emakumeen Mundu Martxari ongi etorria emateko. Ekimen hori dela eta Durangaldeko hainbat Udalek ere bat egin dute karabana horren helburu eta ekintzekin.

Nazioarte mailan emakumeen arteko aliantzak sortzen aritu den Emakumeen Mundu Martxa ekimenak “sare feminista bat sortu eta munduan nagusi den matxismoa ikusaraztea“ du helburu nagusia. 

Martxoaren 6an Kurdistanen hasi eta urriaren 17an Lisboan bukatu den martxa hau IV. Nazioarteko Ekintza izango da eta Europa osoko zeharkaldia amaitu aurretik Durangon izango da larunbatean, urriak 3 hain zuzen.

Durangoko Plataforma Feministak prestatutako egitaraua goizeko 10.00etan Pinondoko Andragunean egingo den harrera ekitaldiarekin hasiko da. Karabana horretan datozen emakumeak txalapartarien eta bertsolarien ekitaldiekin jasoko dute eskualdeko emakumeen ongi etorria. Ondoren taldeko argazkia egingo da eta jarraian kantuak eta musika egongo dira eta emakumeen aldarrikapenen berri emango da.

Ordu bete geroago batukadarekin lagundutako manifestazioa abiatuko da Andragunean (edo Andra Marin eguraldi txarra egonez gero) eta bukatzeko partaide guztiak dantzatzera gonbidatuta daude.

Igandean Bilbon

Emakumeen Mundu Martxa Bilbora helduko da igandean eta hiri horretan egun osoan egongo diren ekitaldietan parte hartzeko gonbidapena luzatu dute Durangoko Plataforma Feminista eta Andereak.

Berriz, Durango eta Elorrioko Udalek deia egin dute Durangon zein Bilbon egingo diren ongi etorri eta prestatutako gainontzeko ekitaldietan parte hartzeko. Eskualdeko herrietan onartutako adierazpenean “Emakumeen Mundu Martxari babesa eman eta bere esku dauden baliabideekin berdintasunaren alde lan egiteko eta neurriak hartzeko konpromisoa” hartu zuten.

Aldarrikapen horren helburu nagusiak indarkeria sexistari aurre egin eta ekintza protokoloak martxan jartzea; zaintzaileen bizitzak hobetzeko lan egitea; aniztasun sexuala eta genero identitatea kontuan izanik lan egitea eta, azkenik, emakumeen jabekuntza sustatzea eta baita saretze eta emakume taldeen sorrerak bultzatzea.