Desobedientzia zibila berriro ere delitu

Aste honetan, Urbinan atxilotutakoen aurkako epaia atera dute. Orain dela hiru urte AHTren aurkako manifestazio jendetsuan atxilotutakoei kartzela zigorrak ezarri dizkiete, baina zorionez batek ere ez du zigor hori bete beharko. Epaituetako bat durangarra da, eta 7 hilabeteko kartzela eta 120 euroko isuna jarri dizkio epaileak.

Egun hartan Urbinan bortitz jokatu zuten bakarrak polizia autonomikoak izan ziren, eta eurek zigortu beharko lituzkete manifestazio baketsu bati modu basatian erantzuteagatik. Hala ere, protestan parte hartu zutenen aurka egin dute epaileek betiko moduan, eta berriro ere, desobedientzia zibila delitu bihurtu dute.

Larriak ez balira barregarriak izango lirateke orain dela urte batzuk Ibarretxek eta Lopez Gereñuk hainbatetan bota zituztenak, esanez modu baketsuan izanez gero zilegi zela AHTren aurka egitea. Gezurra gezurraren gainean; lehen eta orain. EAJk ahalegin berezia egin zuen hasieratik AHTren aurkako oposizioa isilarazteko eta kriminalizatzeko, eta horretarako, bere esku zeuden bitartekoak erabili zituen: polizia eta ETB. Gaur egun ere, PSEk beste horrenbeste egiten du.

Aurka dagoen jendea zigortzen duten bitartean, euren negozioarekin jarraitzen dute. EAEko aurtengo aurrekontuetan, arlo gehienetan murrizketak egin dituzten arren, AHTrako dirua % 30 puztu dute, beharrizan sozialen kaltetan. Nork uler dezake zerbitzu sozialetan murrizketak egotea, eta erabilgarria izango ez den proiektu batean diru gehiago gastatzea?

Honen guztiaren aurrean gure erantzuna ezin daiteke beste bat izan. Argudioz leporaino armatuta gaude ozen esateko proiektu txikitzaile hau ez dela herritarren mesederako eta elite pribiligiatu bati erantzuten diola. Beraz, gobernuaren jarrera oldarkorrak gogotsu lan egiteko eta borrokan jarraitzeko indarra ematea besterik ez du lortuko.