Eskualdeko argitalpenek leku berezia izango dute 58. Durangoko Azokan, Durangoko Merinaldearen Amankomunazgoaren babesarekin ‘Durangaldeko argitalpenak’ erakusmahaia jarriko baita. Bertan, 23 eragileren 90 lan egongo dira eskuragarri eta horietatik 10 nobedadeak izango dira.
Erakusmahaian izango diren eragileen artean udalak, elkarteak eta norbanakoak daude. Aurten argitaratutako hamar nobedadeen artean Elaia Torres Bizkarrak argitaratutako ‘Sustraidun umea’ eta ‘La niña con raíces’ ipuinak; Alfredo Piedrafitaren argazkiekin eta Alfon Bañeresen testuekin sortutako ‘Mandarina misio bat dut’, edo Peru Magdalena eta Iraia Okinaren ‘Dakota Txikiren muki bidaiaria’ aurkitu daitezke.
Victor Arrizabalaga eta Tadanori Yamaguchik berriz, Mañariko Angurretako gune artistikoaren inguruan egindako ‘Denboraren aztarna-La huella del tiempo’ liburua kaleratu dute, eta Javier Lanak sortutako ‘Vigila el tiempo-Zaindu egudaldia’ ere eskuragarri egongo da.
Eskualdeko musika berrikuntzak ere eskuratu ahal izango dira ‘Durangaldeko argitalpenak’ erakusmahaian; hain zuzen, Sweet Rage taldearen ‘Abian’, eta Felix Ibarrondoren lanekin Silboberri Txistu Elkarteak argitaratutako ‘Signature’ diskoak.
Anboto aldizkariak eta Umerri eskola aktiboak 2024rako egindako egutegiak osatuko dute eskualdeko sorkuntza berrien eskaintza.
“Dagoeneko 19 urte bete dira Gerediaga Elkarteak eskualdeko sortzaileen ikusgarritasunerako eta parte hartzea errazteko ekimena martxan ipini zuela. Urte guzti hauetan Mankomuniateak laguntza eskaini du”, eskualdeko erakundetik adierazi dutenez.
Eskualdeko argitalpenen erakusmahaia Gerediaga Elkarteak jarriko duenaren alboan kokatuko da, eta Azoka antolatzen duen erakundeko kideak arduratuko dira kudeaketaz.
Gerediagaren egutegia eta aldizkaria
Gerediaga Elkarteak, bestetik, nobedade moduan 2024ko egutegia eta Astola aldizkariaren 17. zenbakia izango ditu azokan. Urtez urte, dagoeneko argitaratzen duen 28. egutegia da, eta aurtengo bilduma argitaratzeko, Durangoko Merinaldearen Amankomunazgoa izan du babesle nagusia.
Urtero legez, argazki zaharrak izango dira orriz orri eta egutegi berrian Ignacio Ansorenaren bildumako irudiak erakutsiko dira. Argazkilariaren familiak Gerediaga Elkartearen esku utzi zuen bilduma, eta digitalizatu ondoren elkartearen dokumentategian erakusgai egongo dira. “2024ko egutegia bildumako argazkiekin jantzita, aitortza egin nahi zaio argazkilariak eskualdeko eta bereziki Durangoko historia grafikoa jasotzen egin duen lanari”, adierazi dute Mankomunitatetik.
Cargando...
