Durangoko Azokak euskara ikasten ari diren helduentzako tailerrak eskainiko ditu lehenengo aldiz

Durangoko Azokaren egitarauan ohikoak diren jarduerez gain, euskara ikasten ari diren helduentzako taillerrak prestatu dituzte aurten berritasun modura. Ekimen hauek, euskaltegi, berbalagun, irakurketa klubak eta bestelako euskara ikasleei zuzenduta daude batez ere.

Antolatutako lau ikastaroak Durangoko ‘Listoriatura’, Wikipedia maratoia, hip-hop tailerra eta bikoizketa tailerra izango dira eta abenduaren 2an ospatuko den Ikasle Eguneko arratsaldean burutuko dira.

Durangoko ‘Listoriatura’ Areto Nagusiak antolatutako bisita gidatua da. Irakurketa taldeei begira prestatutako ekimen honek, istorio txikiz osatutako ibilbidea egingo du Durangoko Alde Zaharretik, hiriarekin lotura izan duten idazle eta euskaltzaleen berri emanez. Bisita 16.00etan hasi eta 18.00etan amaituko da eta tarteka irakurketak burutuko dira.

Kulturarekin harremana duten artikuluak baliatuz, Wikipedia Maratoiko partehartzaileek entziklopedia birtual horren funtzionamendua ezagutu eta bertan editatzen ikasiko dute. Kabi@k antolatutako ikastaroa esperientzia-geletako ikasleei edo historia-zalei zuzenduta dago eta beharrezkoa izango da gutxienezko euskara maila izatea. Tailerra 16.00etan hasiko da eta Euskal Wikilarien Kultura Elkartearekin elkarlanean antolatuta dago.

Ahotsenean burutuko da Endika Albella 121 Crew taldeko kide ohiak emanago duen hip-hop tailerra. Ekimena berbalagun taldeei, euskaltegietako ikasleei eta oro har euskara erabiltzeko gogoa duten ikasleei zuzenduta dago eta bertan DJ baten erritmora moldatzeko testuak nola idatzi behar diren ikasiko da. Tailerra 17.00etan hasiko da.

Zineuskadiren laguntzarekin Irudienea gunean egingo den Bikoizketa tailerra izango da aurtengo laugarren nobedadea. Zine-klub eta berbalagun taldeei zuzendutako ekimenean  telebistan ohikoak diren telesail eta filmetako pasarteak nola bikoizten diren ikasiko dute.

Bikoizle profesionalak gidatuta, partaideek bikoizketa gauzatzeko prozesua ezagutuko dute lan originalak ikusi eta beren ahotsa grabatzen dutelarik. Horretarako gidoiaren irakurketa, entsegua, pertsonaiaren ahotsa bilatzea, interpretazioa eta abarrekoak egin beharko dituzte.

Bikoizketa tailerrak bi saio izango ditu; bata 16.30etatik 18.00etara eta bigarrena 18.30etik 20.00ak arte. Talde bakoitzean asko jota 20 lagun izango dira.

Iragarritako jardueratan parte hartu nahi duten euskaltegi edo gainontzeko taldeek izena eman beharko dute aldez aurretik ikasleak@durangokoazoka.eus e-posta helbidera idatziz. Bertan, euren datuak (izen-abizenak, helbidea, telefono-zenbakia, e-posta eta taldearen ikasle kopurua) eman behar dituzte. Izena emateko epea azaroaren 15ean amaituko da.

Ikasle Eguneko goizean berriz, urtero legez, Euskal Herriko herrietatik gerturatutako ikasleak izango dute protagonismoa, bertaratzen diren gaztetxoek Landakoko erakusleihoak ezagutzeko eta antolatutako jardueretan parte hartzeko aukera izango dutela.