Durangoko Julene Azpeitia literatur lehiaketarako lanak apirilaren 26a arte aurkeztu daitezke

18 urte arteko durangarrek eta adin horretatik gorako edozein herriko sortzailek, eurek idatzitako ipuin, bertso edo koplak eta olerkiak aurkeztu ahal izango dituzte apirilaren 26a arte 2024ko Julene Azpeitia literatur lehiaketara.

Durangoko Udalak antolatutako lehiaketaren helburua “komunitateko gazte eta helduen artean euskararen sormena eta erabilera sustatzea” da. Horrez gain, lehiaketari izena ematen dion Julene Azpeitiaren ekarpena goraipatu nahi du “hezkuntza eta kultura euskaldunaren historian figura enblematikoa” izan zelako.

Lehiaketak hiru sail izango ditu: ipuinak, olerkiak eta bertsoak edo koplak. Sail bakoitzean, adinaren arabera, bost kategoria daude: Lehen Hezkuntzako 5. eta 6. mailako ikasleak; Bigarren Hezkuntzako 1.go eta 2. mailakoak; Bigarren Hezkuntzako 3. eta 4. mailakoak; Batxilergo eta Lanbide Heziketako maila ertainekoak; eta azkenik, 18 urtetik gorakoak.

Lehen bi kategorietako irabazleek liburu sortak jasoko dituzte, eta hirugarren eta laugarren kategorietako irabazleek 150 eta 200 euroko diru-sariak jasoko dituzte. 18 urtetik gorako kategorian 600 euro jasoko ditu ipuin sailaren irabazleak, eta bertso edo kopla zein olerki ataleko irabazleek 300 euroko sariak eskuratuko dituzte.  

Ezarritako sariez gain, epaimahaiak akzesitak ematea proposatu dezake; horrela balitz, saria liburu-sorta bat izango litzateke.

Idazlanak Durangoko Udaleko Euskara Sailera bidali beharko dira, apirilaren 26a arte. Posta arruntez bada, Julene Azpeitia Lehiaketa. Durangoko Udala – Euskara Saila. Barrenkalea 17 – 48200 Durango helbidera, eta posta elektroniko bidez bidaltzen badira juleneazpeitia@durango.eus e-mailera.

Ekimen honen bidez, Durangoko Udalak “gazteei euskaraz modu sortzailean hitz egiteko motibazioa eman nahi die”. Lehiaketak, gainera,  “herriak euskararen sustapenarekin duen konpromisoa islatzen du, normalizaziorako eta hedapenerako ahalegin historiko eta garaikideekin lerrokatuz”.