Durangon egin den Book Trailer lehiaketak lau ikastetxeko
132 ikasle erakarri ditu

Giza baloreak sustatzeko eta irakurzaletasuna bultzatzeko helburua duen Durangoko Book Trailer lehiaketak aurtengo irabazleak eman ditu ezagutzera. VI. edizio honetan Zabalarra, San Antonio eta Nevers ikastetxeetako eta Fray Juan de Zumarraga institutuko 11 eta 17 urte bitarteko 132 ikaslek parte hartu dute.

‘Gerrak ez du izenik’ izenburu duen lanak irabazi du A kategoria, egileak Zabalarra eskolako Ugatz, Osama eta Luken direla. ‘Oroimenaren Azala’ ekoizpenak berriz, B kategoriako irabazlea izan da eta egileak Fray Juan de Zumarraga institutuko Laura eta Josuren lan-taldea da. Azken lan horren gidoigileak, Laide eta Jonen lan-taldeak, gidoi onenaren saria ere eskuratu du.

Sari banaketa ekainean zehar egingo den ekitaldi pribatu batean burutuko da. Book Trailer onenaren irabazleak, A eta B kategorietan, 150 euroko bono bat eta beste 150 euroko bonoa Durangoko liburu dendetan gastatzeko ekuratuko dituzte, eta Gidoi onenaren sariak 150 euroko bono bat eta Zugaza zinemara joateko 10 sarrera jasoko dituzte.

Book Trailer lehiaketa Durangoko Udaleko Kultura eta Inmigrazioa sailak, Bizenta Mogel Bibliotekak eta Durango Irratiak antolaturiko ekimena da eta azken atalera 47 bideo iritsi dira. Hauetatik, 32 A kategorian (2006-2008 jaiotakoak) aurkeztu ziren eta gainontzeko 15ak B kategorian (2002-2005).

Bakea eta bizikidetza

Lehiaketaren epaimahaikideak Elena Olabe idazlea eta Antton Izagirre diseinatzailea izan dira eta beraien epaia ematerakoan bideoaren gidoia, sormena, irudia eta izan duen eragin emozionala kontutan hartu dira.

Book Trailer ekimena bakearen eta bizikidetzaren aldeko hezkuntza proiektua da eta Durangoko ikastetxeetako hezkuntza dinamikan integratzen da. Ardatz tematiko-estrukturalak gerra eta behartutako lekualdaketa dira.

Horretarako, 2019-2020ko ikasturtean zehar, literatur topaketak garatu dira ikasgelan. Aukeratutako liburuaren gaia hausnartzera gonbidatu zaie ikasleei eta tolerantzia, errespetua, elkartasuna, lankidetza, elkarrizketa eta jarrera kritikoen balioak eta jarrerak sakondu dituzte. Bakea eta bizikidetzarako kultura eraiki eta prestakuntza tailerrak bideratu dira, proiektuaren sormena eta produkzio prozesua errazten duten teknikak eta tresnak irakasteko helburuarekin.