Egitarau “zabala eta txukuna” prestatu dute Landako Gunean jarriko den Txosnagunerako

Durangoko Txosna Batzordeak biltzen dituen izaera ezberdinetako 14 eragileek, jaietarako egitarau “zabala eta txukuna” prestatu dute urriaren 9tik 18ra ospatuko dituzten San Faustoetarako. Landako Gunean lehenengoz kokatuko den Txosnagunetik “herritarron gehiengoarentzako jaiak antolatzen ahalegindu” direla azpimarratu ondoren “txosnagune finko” baten beharra aldarrikatzen dute.

Kokagune berriaren baliabideak kontuan hartuta, “txosnak espazio ezberdinetan” banatuko dituzte eta Landako Gunearen kanpoaldean “sukalde zerbitzua izango duen karpa, barrak eta agertoki bat kokatuko dira”. Erakustazoka barrualdea berriz, hiru gune egongo dira eta bakoitzean estilo ezberdinetako kontzertu eta musika uztartuko dira.

Urriaren 9an abiatuko den egitaraua, “ixteko arriskuan dagoen Intxaurre Elkartearen eskutik” hasiko da, eta Bizkarki 1937 zanpantzarren kalejiraren ostean txupinazoa piztuko dute arratsaldeko zortziak aldera.

“Adin eta gustu ezberdinetarako ekintzak” antolatu dituztela adierazi ondoren, kontzertu eta bestelako agerraldiez gain umeentzako sorkuntza eta sukaldaritza tailerrak, puzgarriak eta ipuin kontalariak ere tokia izango dutela aipatu dute.

Ohiko erreka jaitsiera, tortilla eta paella txapelketak, haragi-erre dastaketa, gazte eguneko bazkaria eta olinpiadak edo mozorro egunean urrun direnekin gogoratzeko egingo den elkartasun bazkariak ere ez dute huts egingo egitarauan.

Bertsolari eta trikitilarien ekitaldiez gain, “denetariko musikaz gozatzeko aukera” egongo da. Bertan jarritako oholtzetan egongo diren Los Zopilotes Txirriaus, The Riff Truckers, La Jodedera, Las Tea Party edo Bad Sound Systemen agerraldiez gain Luhartzek joko duen erromeria edo Anarik eta Gorantz Erorik iluntzetan eskainiko dituzten musika ekitaldia lasaiagoak ere egongo dira.

Gune finkoaren beharra

Txosna Batzordeak biltzen ditun eragileak “prentsatik” izan zuten aurtengo kokagunearen berri, “jaiak hasteko hiru hilabete eskasen faltan”. Erabakia “berandu” hartu zela salatu ondoren “txosna gune berri honetara egokitzeko antolaketa aldaketak esfortzu eta lan handia” eman diela kritikatu dute.

Horregatik, eta etorkizunera begira, “udalak gurekin batera txosna gune finko bat adosteko prozesu bat” hastea beharrezkoa ikuste dute. Eta elkarrizketetan txosnak jartzeko “aukera desberdinak aztertu” beharra adierazi dute.