EH Bilduk ezezkoa eman die Mankomunitatearen aurrekontuei, sinatutako akordioa ez delako bete

EH Bilduk ezezkoa eman dio Durangaldeko Mankomunitatearen 2023ko aurrekontuari “2022an sinatutako akordioa ez dela bete” argudiatuta. Koalizio soberanistaren arabera, aurtengo aurrekonturako adostutako “neurri nagusienak” ez daude martxan, eta horregatik ez dute babestu datorren urtekoa.

Ainara Otxotorena bozeramaileak hiru ardatzetan arrazoitu zuen koalizioaren jarrera. Alde batetik, gizarte zerbitzuak indartzeko helburua ez da guztiz bete; etxez etxeko laguntzaren arautegia ez dagoelako martxan eta urgentziazko etxebizitza bat behar izanez gero “Mankomunitateak ez du gizarte zerbitzuen karterak agindutako etxebizitzarik”.

Beste alde batetik, eskualdeko erakundeak urtean zehar exekutatzen ez dituen zenbatekoengatik, “udalei likidazioa egitea aztertzea” adostu zela dio EH Bilduk. Hala ere, koalizioak salatu duenez, “egindako azterketa ez da neurri hori aplikatzera bideratu, gerakin guztia inbertsioetan gastatzeko baizik”.

Azkenik,  aurrekontuaren memorian agertzen diren inbertsioekin desadostasuna adierazi dute eta inbertsio planaren kontra bozkatu zutela gogoratu zuen Otxotorenak. Gainera, gizarte zerbitzuak Elkartegian kokatzearekin zalantza handiak ditu EH Bilduk, zerbitzu guztiak ez direlako eraikinean sartzen.

2022ko aurrekontu akordioaren errepasoa egiterakoan, era positiboan baloratu dute hondakin organikoa sustatzeko kanpaina. Otxotorenaren esanetan “EH Bilduren proposamenari esker 620 erabiltzaile berri eta 62 konpostagailu banatu dira, eta kanpainak egiten jarraitzeko beharra” azpimarratu zuen.