Errezetak eta abestiak whatsappez partekatzeko ekimena hasi du Durangoko Turismo bulegoak

Durangoko Udaleko Turismo Bulegoak koronabirusak eragindako konfinamendua arintzeko egitasmo berri bat jarri du martxan. ‘Jan eta Kanta’ ekimenaren bidez errezetak eta abestiak whatsapparen bidez elkarren artean partekatzeko aukera eskaintzen du.

Durangoko “bizilagunek konfinamendu-egun hauetan entretenimendu eta lankidetza gune bat partekatu dezaten” sortutako ekimena, whatsapp talde berri baten bidez egingo da. 10:00etatik 14:00etara, errezeten argazkiak eta kantuen audioak partekatzeko aukera izango dute erabiltzaileek eta Turismo Bulegotik ere hainbat errezeta gehituko dizkiote taldeari.

Ekimenaren helburua “adinekoen jakite gastronomikoa eta abestiak zabaltzea da” eta horrekin batera “denok lagundurik sentitzea”, Udaleko arduradunek adierazi dutenez. “Egoera atipiko hauek konponbide atipikoak bilatzera behartzen gaituzte, berrogeialdi hau ahalik eta modurik onenean eraman ahal izateko”.

‘Jan eta Kanta’ whatsapp taldean izena emateko beharrezkoa da 676242429 zenbakira jo eta ‘Jan eta Kanta alta eskaera’ idaztea edo, bestela, esteka honetan ‘klik’ egitea.

Jasotzen diren ekarpen guztietako batzuk arloko arduradunek aukeratuko dituzte eta www.turismodurango.net webgunean eta Durango Turismo-ko sare sozialetan ere ikus eta entzungai egongo dira.

Durango Irratiak ere parte hartuko du ekimenean, hainbat audio erakutsiz eta watsapp-ean biltzen diren errezeten egileak elkarrizketatuz.