Garaiko udalbatzak aho batez onartu zuen Udalak 2021ean izango duen ia 700.000 euroko aurrekontua, baita tasa eta zerga guztiak dauden-daudenean uztea.
Aurrekontuan tartekatutako egitasmoak zein zergak bere horretan mantentzeko orduan “Covid-19ak sorrarazitako egora” kontuan izan dute. Udalbatzak, gainera, “lehendik dagoen enplegu publikoari” eustea eta “udalerriko jarduera ekonomikoa bultzatzeko sustapen politikak” lehenetsi ditu.
Aurrekontu proiektuan azpiegitura publikoak hobetzeko eta ondarea handitzeko ekimenak tartekatu dituzte. Izan ere, herriko bideak asfaltatzeko eta segurtasuna handitzeko 41.000 euro bideratuko dira. Belardiak eta basoak erosteko berriz, 30.000 euroko diru-atala jarri dute.
Dirulaguntzak
Herriko San Migel Garaiko Nagusiak eta Triatloi Taldearek eta Gerediaga eta bestelako elkarteen artean 23.000 euro banatuko dira; 20.500 euro bideratuko dira umeen udalekuetarako, Euskal Artzain Txakurren Txapelketarako edo herriko hizkera biltzeko eta grabatzeko eta 11.500 euroko diru-atala jarri dute ostalaritza, sukaldaritza eta osatu jarduerak laguntzeko helburua duen Garai Biziarazi bonu kanpainarako.
Udalak hirigintza plana berritzeko askoa agertu du eta horretarako 10.000 euroko atala onartu du eta ur-hornidura sarea hobetzeko eta saneamendu eta euri-urak batzeko 34.000 euroko inbertsioa aurreikusten da.
Udalak kontuan izango ditu klimaren aldaketaren aurkako ekinbideak ere, zuhaitz autoktonoak, hazkunde motelekoak eta itsas pinuak eta japoniar pinuak landatuz 14,2 hektareatan.
Gainera, eguzki panelak jarriko ditu udaletxean eta Kultur Etxean eta ekimen horretarako 25.000 euro bideratuko ditu.
2021eko aurrekontua orekatzeko beharrezkoa izango da Bizkaiko Foru Aldundiarekin adostutako baso-aprobetxamenduaz baliatzea, Udalkutxaren ekarpena murriztuko delako eta jarduera ekonomikoaren beherakadak diru-bilketaren jaitsiera eragingo duelako.
Cargando...
