Gozategi eta AC DC zein Itoizen tributo bandak Culturalaren mendeurreneko jaian joko dute

Durangoko Cultural futbol taldearen mendeurrena aurten betetzen dela eta Landako Gunean zapatuan ospatuko den jaialdi ederra prestatu dute. Bertaratzen direnek musikaz, edariaz eta jatekoarekin gozatzeko aukera egongo dute.

“100 ez dira beti betetzen” aitzakia hartuta, ospakizun ederra antolatu dute taldearen arduradunek aurtengoa urte berezia baita Culturalarentzat zein zaletuentzat. “Gure urteurrena ospatzen gaude eta gure poztasuna denokin konpartitu nahiko genuke”, adierazi dute Tabirako taldearen arduradunek.

Durangarrei zein Cultural edo futbol zaleei irekita dagoen ekimena arratsaldeko 18:00etan hasiko da ateen irekierarekin. Lehenengo kontzertua Espaloian, Itoizen tributo bandak eskainiko du iluntzeko 19:45ean hasita eta 21:45ak aldera Black Ice tribute band–Best AC DC Showaren txanda izango da. Ospakizuna borobiltzeko Gozategi taldearen agerraldia abiatuko da 23:30etatik aurrera.

Arratsalde osoan irekita egongo diren txosna handi bat zein ‘fast food’ furgonetak egonaldi bikain bat pasatzen lagunduko dute.

Bertaratu nahi dutenek 5 eurotan salgai dauden sarrerak erosi beharko dituzte, Tabira futbol zelaian zein Axpe, Anboto, Ibaizabal edo Kale Kantoi tabernetan. Zapatuan ere erosteko aukera egongo da Landakon bertan, arratsaldeko 17.00etatik aurrera. Aldez aurretik erosi nahi dituztenek info@culturaldurango.org helbide elektronikoan eskatu dezakete eta 10 pertsona baino gehiagoko taldeak gasturik gabe jaso ahal izango dituzte.