‘Gutxiegi’ nota ipini dio EAJk Elorrioko Gobernu Taldeak bi urtetan egindako kudeaketari

Elorrioko Udalean dagoen Gobernu Taldeak legegintzaldi erdia bete duela eta, bi urte hauen inguruko balorazioa egin du oposizioan dagoen Euzko Alderdi Jeltzaleak. Talde honen bozeramailea den Joseba Mujikak “gutxiegi” nota ipini die agintean dauden EH Bilduko zinegotziei eta “esperientzia falta” leporatu die.

Udal Gobernu Taldea “ez dela gobernantza onaren eredua” adierazi ondoren, Mujikak egindako balorazioan EAJren hauteskunde programan lehenetsitako 10 egitasmo garatu barik daudela adierazi zuen, nahiz eta “estrategikoak diren Elorrio hazi arazten jarraitzeko”.

Alkatetzarako bere burua aurkeztu zuen Mujikak, eta bere taldea osatzen duten beste bost zinegotzietatik lauk gaur eguerdian egindako agerraldian, Gobernu Taldea “Udalak berak eragiten duen inertziaren mende dagoela eta lanean kostata ari dela”, adierazi dute. Izan ere, “bidean hainbat gai eta kontu egin gabe eta konpondu gabe” utzi baitituzte.

Gelditasuna nagusi

Hori gutxi balitz, Idoia Buruaga alkatea buru duen lantaldean “ez dagoela lidergorik, ezta Elorrioren etorkizunerako planik” salatu ondoren “gelditasuna” nagusi dela salatu du. Gainera, adierazgarritzat jo zuen Gobernu Taldea “Podemosen itzalean egotea” hauteskundeetara begiratutako kalkulu hutsagatik.

Esandakoaren eredu gisa, Pulla-Azkarreta eremuan egin nahi den industriagunea jarri zuen. Mujikarentzat adierazgarria da egitasmo hori garatu gabe egotea, “nahiz eta 2011n EH Bilduk gure aldeko botoarekin onartutako egitasmoa den”. Proiektu hori “albait arinen” desblokeatu behar dela ere esan du, “gure herriaren garapen ekonomikorako ezinbestekoa delako industrialde hori garatzea”.

Egin gabeko beste hainbat egitasmo daudela adierazi dute EAJko zinegotziek, tarteko Elorriok behar duen kiroldegi berria. Azken urte hauetan hainbat alditan eskatu badute “urteko kutxako soberakinekin kopuru handia hartu ahal dugula kirol azpiegitura hau Fytasa lurretan egin ahal izateko”, egitasmoak ez du aurrera egiten.

Herriko nekazal guneak biziberritzeko egindako proposamenak ere gauzatu barik daudela adierazi du talde jeltzaleak. Horren eredu, herriko ura ez duten auzoetara ura eramateko azpiegitura jartzeko eskakizuna edo aurrekontuetatik auzoetako bideetan diru gehiago inbertitzea.

Turismoa sustatu

Argiñetako Museoaren egitasmoa jarri badute turismoa sustatu dezakeen “jarduera ekonomikoaren motore” gisa, ekimen horrek ez du aurrerapenik, jeltzaleek hainbat planteamendu egin badituzte ere.

Buzkantz kalean Udalari utzita dagoen 11.000 metro koadroko orubea inolako erabilera gabe egotea; adiskidetze politikoa eta elkarbizitza landu beharra edo gardentasun ordenantzan adierazitakoa ez dela betetzen ere leporatu diote Gobernu Taldeari.

Gainera, orain arte gauzatutako hainbat egitasmo, Aldapebeitia jauregiko teilatua, auto-karabana parkinga edo egitear dagoen Belengua kalearen urbanizazioa esaterako, “EAJ-PNVk landutako egitasmoak dira, aurreko legegintzaldian egin baitziren proiektuak eta hasierako lan guztiak”.