Herriaren Eskubideak euskara sustatzeko neurriak proposatu ditu

Durangoko Herriaren Eskubideak hainbat neurri tartekatuko ditu bere hauteskunde programan hirian euskararen erabilera sustatzeko asmoarekin.

Koalizio moreak dendariekin elkarlana indartu nahi du “euren komunikazioan laguntzeko eta zerbitzuen sektorean euskararen erabilera indartze aldera”, Udal hauteskundeetako zerrendan bigar postuan joango den Neskutz Rodriguezen esanetan.

Horrez gain, “Landako Gunean ekitaldiak antolatuko dituzten enpresak bi hizkuntza ofizialak neurri berean erabiltzera derrigortu” nahi dituztela adierazi du.

Korrikaren kilometro bat

Egindako adierazpenak zapatuan Durangaldea zeharkatuko duen 21. Korrikaren harira egin ditu koalizio morearen hautagaiak. Izan ere, Herriaren Eskubideak kilometro bat erosi du “AEK-k antolatutako Korrikan aktiboki” parte hartuz. Rodiguezek 19:00etan jasoko du lekukoa Madalenan koalizioaren izenean.

Koalizio morearen zerrendan azalduko diren hainbat kide “ni barne, AEK ‘kumeak’ gara. Beraz, bai gela barruan bai kalean egiten duten helduen euskalduntze eta alfabetatze lana primeran ezagutzen dugu”, adierazi du gaur egun Batzar Nagusietako kidea den Rodriguezek.

Horrez gain, “euskara gure kulturaren eta bizitzaren parte” dela adierazi du eta “Korrika gure hizkuntza sustatu eta bultzatzeko ekitaldi garrantzitsuenetakoa” dela azpimarratu du. Hori dela eta, “ziur gaude aurten ere durangarren parte-hartzea jendetsua izango dela”.

.