Hilarión Sarrionandia, bereberren hizkuntzan adituari omenaldia egingo diote Garain

Garaiko Udalak eta Gerediaga Elkarteak Pedro Hilarión Sarrionandia omenduko dute bere heriotzaren 100. urteurrenean. Arabiarrez ikasi ondoren, bereberren hizkuntza ikertzen hasi zen Sarrionandia. Lehen gramatika idatzi zuen, hizkuntza horretako filologia lanen aitzindari bihurtuz. Omenaldia datorren igandean ospatuko da, eguerdiko 12.00etan Garaiko Udaletxean. 

Igandeko ekitaldia eguerdiko 12.00etan burutuko da Garaiko udaletxean. Bertan Hilarionen bizitza eta lanak laburki ezagutzera eman ondoren, Iban Gorritik eta Ibai Elorzak prestatutako laburmetrai bat proiektatuko da eta Joseba Sarrionandiaren aipatutako liburuaren pasarte hautatuak irakurriko dituzte Unai Iturriagak, Leire Bilbaok eta Manu Ertzillak Durangaldeko beste idazle batzuekin batera.

Hilarión 1865. urtean jaio zen Garaiko Barrenkuatze baserrian eta 1913ko abuztuaren 5ean hil zen Amorebietan, Durango – Bilbo tranbian izandako istripu baten ondorioz. Gazterik frantziskotarren ordenako fraide sartu zen eta Galizia eta Andaluzian ikasketak egin ondoren Maroko aldeko misioetara joan zen.

Joseba Sarrionandia

Aita Jose Maria Lertxundi arabiar oriotarrak bultzaturik, arabiarrez ikasi ondoren bereberren hizkuntza ikertzen hasi zen eta 1905ean hizkuntza horren lehen gramatika idatzi zuen, hizkuntza horretako filologia lanen aitzindari bihurtuz. Bere lanak gaur egun oraindik oinarrizkoak dira Rif eta Marokon erabiltzen den bereber edo amazigera hizkuntza ikasterako orduan.

Hilarión Sarrionandia da Joseba Sarrionandia idazleak idatzitako azken liburuaren ardatza. ‘Moroak gara behelaino artean?’ izenburuko ikerketan Josebak, Hilarionen figura eta lanak berreskuratzeaz gain, Espainiak eta Morokok XIX. mende bukaeran eta XX. mendeko lehen hamarkadetan izan zituzten harremanak arakatzen ditu, eta, bereziki, misiolari, soldadu eta enpresa gizon euskaldunek izan zuten protagonismoa azpimarratzen du.

DURANGON. Garaiko albisteak