Hizkuntza ohiturak aldatzeko helburua duen ‘Euskararen kriseilua’ Berrizera heldu da

6 eta 7 urteko umeak dituzten familia berriztarrak “euskararen sua piztuta izateko” konpromisoa hartzeko aukera izango dute abenduaren 4a bitartean burutuko den ‘Euskararen kriseilua’ egitasmoarekin.

“Hizkuntza ohiturak aldatzeko helburua” duen ekimenaren bidez, parte hartzen duten umeek etxez etxe txandaka ibiliko den kriseilua “zaindu eta hizkuntza ahalik eta gehien” erabiltzeko konpromisoa hartuko dute.

Euskaltzaleen Topaguneak martxan jarritako egitasmoarekin bat egin dute Berrizko Udalaren Euskara zerbitzuak eta Learreta-Markina eskolak. Eragileen arabera “etxea ezinbesteko gunea da hizkuntzaren transmisio eta sozializaziorako” eta horregatik euskararen sua bizirik mantenduko duen kriseilua etxean gorde ahal izango dute.

Gainera, kalean, eskolan zein etxean egiten den hurbileko transmisioaren bidez “hizkuntza jaso, bizirik mantendu eta hurrengoei pasatzeko ardura” partekatzea ahalbidetzen du.

Erabilera handitzeko konpromisoa

LH1 eta LH2 mailetako ikasleei zuzendutako ekimenean parte hartzeko beharrezkoa da izena ematea eguaztenera arte, hilak 13, berriz.kriseilua.eus webgunean edo Learreta-Markina ikastetxean bertan. Parte-hartzen duten haurrek etxera eramango dute astebetez Euskararen kriseilua.

Kriseilua zaintzeko txandarekin batera, familiaren hizkuntza ohiturak aztertzen dituen galdetegi bat betetzera gonbidatuko dira familiak, euskararen erabilera handitzeko konpromiso ezberdinak hartuz.

Abenduaren 4an, egitasmoari merezi duen bukaera emateko, Euskararen Kriseilua etxean izan duten familia guztiak elkartuko dituen ekitaldi berezi bat egingo da.

Berrizera heldu aurretik kanpaina hau martxan jarri da Gatikan, Diman, Ordizian, Oñatin Hondabirri edota Plentzian.