Jabier Iriondo pelotaria omenduko dute jaietan

Bihartik aurrera eta datorren asteko igandea arte luzatuko dira Izurtzako jaiak. Aurten ohiko bertsolariak, bakailao txapelketa eta gainontzeko ekintzez gain Jabier Iriondo pala jokalariaren kirol ibilbidea ere omenduko da. Ekitaldia datorren ostegunean, hilak 8, ospatuko da hain zuzen ere. Izurtzako Udalak atondu duen jai egitarauan ezin da falta disfraz gaua, ezta gaueko kontzertuak. Zazpi egunetan zehar adin guztietarako ekitaldiak proposatzen dira.

Bihar iluntzeko zortzietan hasiko dira Izurtzako jaiak txupinazoa eta trikipoteo herrikoi batekin. Aipatzekoak dira larunbatean ospatuko diren bakailao txapelketa eta honen ostean egingo den herri bazkaria.

Igandean Eneko Abasolo ‘Abarkas’ iurretarra eta Onintza Enbeita bertsolariak egongo dira jai giroa ematen, herri bazkariaren aurretik. Arratsaldean zehar hainbat ekitaldi egongo dira jai giroa iluntzera arte luzatzeko.

Jaien bigarren asteburua

Etenaldi bat egin ostean ostegunean jaiek jarraituko dute. Egun honetan Jabier Iriondo pala jokalariari omenaldia egingo zaio lortutako garaipenak eta bere kirol ibilbidea gogoratuz. Iriondok 1989an debutatu zuenetik zenbait garaipen lortu ditu: lehena Euskadiko txapelduna izan zen 1991an, bikoteko jokoan eta horrez geroztik ‘Villa de Bilbao’ txapelketa irabazi zuen 1993an, 1997an eta 2003an, hain zuzen ere.

Larunbatean disfraz gaua ospatuko da ‘Ze Esatek’ eta ‘Zirkinik bez’ taldeen emanaldiekin. Jarraian DJ-ak egongo dira  Gaztelekuan.
Igandean jubilatuentzako bazkaria eta Mus txapelketarekin bukatuko dira jaiak. 

Aipatutako ekintzekin batera, frontenis eta pilota txapelketak, mezak eta haurrentzako hainbat ekintza ospatuko dira, beste askoren artean,  jaiak iraungo dituen zazpi egunetan zehar.

DURANGON. Izurtzako jaiak