Kirol elkarteen arteko solasaldi batekin hasiko dira gaur Zornotzan Euskararen Eguneko ekitaldiak

Abenduaren 3an ospatzen den Euskararen Nazioarteko Egunaren harira, Amorebieta-Etxanoko Udalak hainbat ekitaldi antolatu ditu gaurtik domekara bitartean. Prestatutako egitarauak “zornotzarren artean hizkuntza aniztasunaren inguruan sentsibilizatzeko eta euskararen erabilera sustatzeko” helburua du.

Ekitaldiak gaur bertan hasiko dira Zelaieta zentroko kontzertu gelan izango den ‘Euskararen erabilera: jardunbide egokiak kirolean’ solasaldiarekin. 18:00etatik aurrera, herriko kirol elkarteak haur eta gazteen artean euskararen erabilera sustatzeko esperientziak eta praktika onak partekatuko dituzte. Iritzi trukaketaren helburua etorkizuneko erronkak identifikatzea eta komunitatean euskara sustatzen jarraitzeko jarduera-ildoak zehaztea da.

Barikuan, abenduak 1, Oihane Amantegiren ‘Ibaiertzeko ipuina’ liburuaren irakurketa jarraitua egingo dute Zelaieta zentroko auditoriumean, 17:3oetik 19:30era.

Saioa amaitu ondoren, Kantakatiluko kideek, trikitixak lagunduta, giroa alaituko dute abestiekin. Herritar guztiak gonbidatuta daude kantuarekin bat egitera eta arratsalde atsegin batez gozatzera.

Prestatutako azken bi ikuskizunak Zornotza Aretoan izango dira. Lehena zapatuan, 17:00etan hasita,‘Doraemon: Nobitaren dinosaurio berria’ pelikula emanaldia egongo da, eta bigarrena domekan, 20:00etan, Zuhaitz Gurrutxagaren ‘Futbolisto’ bakarrizketa izango da. Futbolari ohiak Realeko jokalari gisa izandako bizipenak eta pasadizoak partekatuko ditu, baita Nahaste Obsesibo-Konpultsiboarekin (TOC) izandako esperientzia pertsonala ere.

Gainera, Ludotekan eta Gazte Txokoan, haurrek eta gazteek Euskararen Egunarekin lotutako tailerrak eta jolasak izango dituzte abenduaren 1etik 4ra.

Adierazpen instituzionala

Amorebieta-Etxanoko Udalak udalerrian euskara eta hizkuntza-aniztasuna sustatzeko konpromisoa berretsi du eta azken Osoko Bilkuran aho batez onartu zuen adierazpen instituzionala.

Adierazpen horretan “euskal gizarteak bi hizkuntza ofizial dituela, baina oraindik urrun gaudela gizarte elebidun orekatua izatetik” gogoratzeaz gain, “euskara hizkuntza gutxitua” dela eta ezinbestekotzat jotzen dute “gizarteko esparru guztietan herritarren hizkuntza-eskubideak bermatuta egotea ahalik eta modu orekatuenean”.

Udalak “euskararen erabilera guztiz normalizatua izan dadin” beharrezko diren araudiak indarrean jarriko dituela eta “euskararen erabilera instituzionala eta administratiboa erabatekoa” izateaz gain, “ausart jokatuko du auzitegietatik datozen sententziekin”.

Gainera, Udalak “Plan Estrategiko (ESEP) berria onartuko du, gure udalerriko esparru guztietan euskararen erabilera areagotzeko, eta horretan sustatzaile direnak saritzeko”.