Marta Cardenas margolari donostiarraren obra batek iragarriko du aurtengo edizioa

Azken urteetan egin den bezala, ezaguna den eta ibilbideko luzeko artista baten obrak iragarriko du aurtengo Durangoko Azoka. Donostian jaio eta egun Madrilen bizi den Marta Cardenasek eskuz egindako lanak iragarriko du, abenduaren 5tik 8ra izango den 49. Azoka.

Azokak ezaugarri izango duen kartela  “eskuz egina dago” Cardenasen esanetan eta “kartela nola hasi?” bere buruari galdetzerakoan “Mexikoko marrazki bat” aurkitzeak eman zion erantzuna. Obrak “argi asko du” eta horia eta beltza gailentzen badira turkesa eta morea ere tartekatzen dira. Kolore horia aukeratzea, “benetako kolore argitsua” delako arrazoitu zuen artistak, hau da “kolore aratza” delako. 

Cardenas 1944an jaio zen Donostian eta Madrileko San Fernando akademian hasitako ikasketak Parisen jarraitu zituen Frantziako gobernuaren beka batekin. Bere lehen obrak erretratuak eta paisaiak izan baziren, mugimendura jauzia  egin zuen gero. 1996an Indiara egindako bidaiaren ondoren, pintura abstraktuan murgildu zen. Ordutik, beste kultura batzuetako interesa piztu zitzaion eta forma, irudi eta kolore berriekin esperimentatzen hasi zen. 

Nestor Basterretxea eta Itziar Okariz

Bere lehen erakusketa Donostian 1970ean egin zuen  eta 1974an, orain dela 40 urte, Durangoko Ezkurdin erakutsi zuen bere obra. Ondoren, Europako zenbait hirietako galerietan erakutsi ditu bere lanak. 

Gerediaga elkarteak azken urteetan egin duen bezala, euskal artista bati enkargatu dio Azokaren irudia. Nestor Basterretxea izan bazen 2012ko edizioko kartelaren egilea, iazkoa Itziar Okarizek egindako obra batek iragarri zuen . 

San Agustin Aretoan gaur egindako aurkezpenean artista bera , Durangoko Azoka antolatzen duen Gerediaga elkarteko presidentea Nerea Mujika eta Txelu Angoitia argazkilaria izan dira. Mujikaren esanetan iazko partaidetza inoiz baino handiagoa izan bazen ere, aurten “bisitari eta sortzaile berriak” erakartzeko esperantza du.