Abadiñoko EH Bilduk Mikel Urrutia izango du alkategai datorren maiatzean izango diren Udal hauteskundeetan. Alderdi soberanistaren zerrendaburua Abadiñoko Udaleko zinegotzia da gaur egun eta ikasketez ingeniaria bada ere ogibidez Abadiñoko institutuko irakaslea da.
Zinegotzi betebeharrengandik jasotako esperientzian oinarrituta, “prest dago udaletxearen gidaritzarako eta zabaltzen den ziklo berri honen lidergoa eramateko”, alderdi abertzaleak zabaldutako prentsa oharrean azaltzen denez. Urrutiak “Abadiño justu, feminista, inklusibo eta parte hartzaile baten alde egingo du lan”.
EH Bilduk zabaldutako oharrean aurreratzen denez, alkategaia herriko “baliabideak hobeto eta era eraginkorragoan” erabiltzen saiatuko da, udaletxearen kudeaketan hainbat gabezi ikusten baitira.
Alkatetzara helduz gero, Urrutiak “herritarrei udaleko erabakietan parte hartzeko aukera zabalduko die”; Ondasun Higiezinen Zerga (IBIa gaztelaniaz) jaitsiko du, zerga sistema duin eta justua arautuko baitu “herritarrak ito gabe herriko beharrizanak betez” eta gastu ez-funtsezkoak ezabatuko ditu “herriko ekipamenduen mantenu egokian eta estrategikoak diren alorretan erabiliko du dirua”.
Inbertsioen alorrean gastua modu orekatuan egitea aurreikusten du, estrategikoak diren gaiak lehenetsiz; haur eta gazteen aisialdi eskaintza hobetuko du; etxebizitzen alokairurako laguntzak emango ditu edo ‘Abadiño lagunkoia’ko helburuak betetzeko inbertsioak egingo ditu.
EH Bilduk urtarrilaren 19an, eguerdiko 12:00ean egingo du Mikel Urrutiaren aurkezpen ekitaldi publikoa Txanporta kultur etxean.
Cargando...
