Badator udaberria

Negu luze eta euritsuaren ostean badator udaberria. Laster da hemen. Natura hasi da izartzen. Larreak berdetzen. Zuhaitzak loretzen. Kimuak pipiltzen. Naturak ez du hutsik egiten. Urtero etortzen zaigu ohiko hitzordura.

Gizandreok ordea ez dugu lurra eta natura entzuteko tarterik hartzen. Ez dugu ingurura begiratzen, aurrrera eta aurrera goaz, lasterketa itsuan. Udaberriko liliak loratzen hasi diren bitartean, gizandreon ankerkeriak bizirik eta zutik dirau. Osterantzean nola ulertu egun hauetako gertakariak.

• Etxegabe bat hotzak hilda aurkitu dute Biarritzen. Beste bat Bokalen, era berdinean.
• Kamiolari bat hil da estresak jota Elorrion. Ertzain bat Bilbon bihotzekoak jota.
• Dispertsioa salatzeagatik preso dagoen Alfredo Remirez Basauritik Darocara eraman dute.
• Marokoko poliziak indarkeriaz erreprimitu ditu protesta egin duten sahararrak.
• Ertzainek gomazko pilotak erabiltzea eskatu dute.
• Valtonyc raperoak hiru urte t´erdiko kartzela zigorra jaso du kanta bat egiteagatik.
• 3 emakume atxilotu dituzte Valladolid-en M8ko greba deialdirako kartelak jartzeagatik.
• Rayo Vallecanori 30.000€ko isuna jarri diote arrazismoaren aurkako mosaikoagatik.
• Kurdoak gogor eraso ditu Turkiak Efrinen (Siriako Kurdintanen).
• Emakumeek gizonen indarkeria jasaten jarraitu dute; Usurbil, Gasteiz, Calahorra…
• 66 neskato desagertu dira Nigerian Boho Haram-en eraso batean.
• Bilboko portutik armak irteten dira Saudi Arabiarantz.
• Yemengo gizarte zibila bonbardatzen dute Saudi Arabiak eta Estatu Batuek.
• Siriako Guta hiriko bonbardaketetan, joan den astean, 520 pertsona hil dira.
• Trumpek irakasleei armak jarrita konpondu nahi ditu eskoletako arma tiroketak.
• Bartzelonan Mossoek Erregeren bisitaren aurka manifestatu direnak gogorki egurtu dituzte.

Zerrenda amaigabea da baina, zer egin ankerkeria honen aurrean? Ez da erraza. Halere, itsu, gor eta mutu egon beharrean, begiak zabaldu, belarriak erne jarri eta ahotza jasoteko adorea bildu dezakegu behintzat. Bitartean, Joxan Artzeren lurrari buruzko poema astiro astiro irakurtzea lagungarri gertatu zait niri. Hortxe doakizue.

Lurrak ez digu ezer esaten

éz ez dioskulako ezer,

ez diogulako entzuten baizik,

lurrak ekarriko digun mozkina bakarrik gogoan.

Beharrezkoa dugun jatekoaz gain

askoz beharrezkoagoa dugun miresgarriagorik

bilduko genuke lurrak dioskunetik entzungo bagenio

ikasle onak irakasle jakintsuari jakinminez entzun ohi dion legez.

Marisa Barrena psikopedagogoa da