Erlojuaren tik tak zarata entzun ondoren eta ohetik esnatzerakoan, begiak zabaldu eta lehenik eta behin leihora hurbildu naiz, gaurko iragarritako eguraldi txar hori zertan zebilen ikustera. Lehiotik begiratu eta ene, hau tristura. Izotza eta hotza. Nire alabarentzat, ordea, paisaia ederra, elurra. Noski, Olentzero laster dator eta elurra egiten hasi behar da. Gabonetako postaletan azaltzen den bezalako paisaia gogoratu beharra dago urteko sasoi honetan.
Aparkalekuan utzitako nire auto urdina zuriz margoztutako manta bat zeukala ematen du eta inguruko landak eta teilatuak denak zurituta. Izotza galanta bota duena gaur goizaldean . Eguraldi txar honekin lanera joan beharrean izara artera joango nintzen gustora baina lanera joan beharra dago eta pozik gainera! Egoera ekonomiko latz honen aurrean, dena egiteko prest egon behar da langilea. Ematen du errua geurea dela, ezta?
Dena zurituta eta autoak zuen izotz kapa kentzeko, nolako komeriak! Autoaren berogailuari topera eman behar izan diot izotza kentzeko. Kosta egin zait baina azkenenan lortu dut baina zeregin horretan, hamar minutu baino gehiago galdu ditut. Ez nuen sinetsi eguraldiaren iragarpena hain eskaxa izango zenik. Izpilutik ikusteko ondo zegoenean, errepidea hartu eta lanera iristerakoan, betiko inguruan aparkatzeko lekurik ez zegoen. Ene, ama. Eta orain zer? Non aurkituko dut aparkalekua? Eskerrak autoa txikia dela baina halere, bueltak eman behar izan ditut eta han, aurkitu dut. Batek utzitako tokia aprobetxatu dut eta nik hartu diot beste bati. Dena dago programatuta eta hamar minutuko atzerapenarekin, dena okertzen da. Ai, Jainkoa!
Aurreko asteetan paisaia grisa, eguzki piztiak ikusi barik eta ura eta ura. Gure inguruko erreketatik ura gainezka zetorren. Norbera ere neguko jantziarekin eta hain gorrotagarria zaidan aterkia lagun. Lepoa ondo estalita, neguko botak eta zamarra lodia. Kalea zeharkatzerakoan botoia sakatu nuen eta han auto batek semaforoa ikusi barik aurrera jarraitu zuen eta uraz beteriko pozo bat zapaldu ondoren, zass! Han geunden, buzti buzti egin da.
Orain elurra, izotza eta euria direla eta ez direla kolore guztietako alertak pizten dituzte. Oria, laranja eta gorria ere izan da haize bolada indartsuak jasan ditugunean. Etengo al du eguraldi txar honek. Hau tristura neska.
Uharte tropikal bateko hondartza batean, kokotero baten azpian mojitoak hartzen ibiliko nintzen gustora. Konformatu beharko naiz, Kuban jaiotako durangarrek sortu berri duten elkartea ezagutarazteko antolatutako jaialdiarekin. Nik ez ditut mirarietan sinisten baina larunbaterako gezurra ematen badu ere, hego haizea eta 15 gradutik gorako tenperaturak espero dira. Ai ene!
Cargando...