Gora San Fausto, Gora Pantxike eta Gora Patxikotxu!

Jaien erdigunera heldu gara. Aurten jaiak ezberdin bizitzen ari gara. Aldaketa urtea da, bai ikuspegi bai bizipen aldetik. Astelehenero udaletxe aurrean beraien eskubideak aldarrikatzeko biltzen diren nagusiak izan ditugu protagonista txupinazo egunean. Beraien ilusioa guk geneuakanari gehitu zitzaion, hitz batean esanda, ITZELA!. Udaletxeko txupinazoa bizi ondoren, betiko legez, txosnetako txupinazora gerturatu ginen bertan zeudenei ere babesa ematera. Zabalarra eskolako gazteak izan ditugu protagonista txupinazo txikian. Giro polit eta alaiean gerturatu ginen kalejiran kamiseta berdeez inguraturik udaletxera. Trikitixa eta panderoaren laguntzaz txupinazorako bereziki sortutako bertsoa hainbat aldiz abestu genuen durangar gaztetxoekin. San Fausto egunean ohorezko aurreskua, artopil banaketa eta gainontzekoak bizi ondoren, udaletxeko plazara dantzatzera atera ginen. Plazerra benetan!

Ekintza eta ekitaldiz josia izan dugu lehenengo asteburua. Jende askok parte hartu izan du gune eta toki ezberdinetan egin izan diren ekintzetan. Jakin badakigu jaiak ez direla denon gustokoak izango, baina 2020ko San Fausto jaietarako badaukagu zer landu eta zer hobetu. Herritarron parte hartzea bultzatu nahi dugu jai herrikoi eta bateratuak egiteko.

Asteburua giro alai eta lasaiean joan den arren,  dena ez da poza izan. Zoritxarrez, urriaren 12n eraso sexista bat gertatu zen txosnagunean. Bertan daukaten protokoloa aktibatu eta berehala eman zitzaion erantzuna egoera horri. Gaur egun bizi dugun egoerari buelta ematea espero dogu eta Gobernu taldeak horretan ahal duen guztia egingo duela zin egiten dizuegu. Eraso sexista bako Durango bat eraiki nahi dugu denon artean

Bigarren asteburua ate joka dugu. Honetan ere, milaka ekintza daude programaturik; tortilla txapelketa, elkartasun bazkaria, mozorro desfilea, talet showa, kirol txapelketak, musika… Espero dugu eguraldia lagun izan eta jaiak giro eder eta onean bukatzea. Gora San Fausto, Gora Pantxike eta Gora Patxikotxu!

Ane Abanzabalegi Durangoko zinegotzia da (EH Bildu)