Independentzia

Finlandiak (finlandieraz Suomi) orain dela
ia ehun urte lortu zuen independentzia, 1917ko
abenduaren 6an.

Herrialde hau Suediaren barnean egon zen
1809. urtera arte, ondoren Errusiaren esku
erori zen eta Errusiar Iraultzaren ostean,
sobietarren menpe gelditu baino lehen,
independentzia lortu zuen.

Independentzia aldarri eta oihuek askori
beldurra sortzen dien garai honetan,
interesgarria iruditzen zait Finlandiari buruzko
zenbait datu gogoratzea. Izan ere, nik neuk,
hotza eta eguzki egun urriak salbu, gustura
hartuko eta onartuko bainituzke hango zenbait
baldintza eta jokabide.

Adituen askoren iritziz Finlandiaren
ekonomia eta ongizate maila etengabe hazten
joan da azken urteotan, eta munduko 11.
herrialde garatuena bihurtu da. Ongizate arloan
garrantzitsuak diren bi arlotan, Hezkuntza eta
Osasuna alorrean, eredugarria dugu Finlandia.

Esate baterako, osasun arloan zaintza
aurreratua dauka Finlandiak. Zaintzaren %76,6
publikoa da, hau da Europar Batasuneko
ehunekorik altuenetarikoa, eta mediku
bakoitzak 307 biztanle baino ez ditu artatzen.
Hezkuntza arloan ere eredugarria dugu. 
KHEE erakundeak
argitaratutakoaren arabera, Finlandiako
hezkuntza, munduko onena da eta 15 urteko
ikasleen irakurtze, zientzia eta matematika
mailak munduko aurreratuenak dira.

Independentziaren aurka daudenek sarri
erabiltzen duten argudioa eta mamua uxatze
aldera gogoratu dezagun Europar Batasuneko
partaide dela 5,4 milioi biztanle dituen
Finlandia. Kataluniak 7,5 milioi eta Euskal
Herriak ia 3 milioi biztanle dituzte hurrenez
hurren.

Finlandian ere txakurrak ortozik ibiliko dira
baina, erakunde garrantzitsuek herrialde
askeena izendatu dute, bere prentsa askea,
ustelkeria eza eta eskubide politikoengatik.
Beraien jarrera neutralagatik gainera munduko
herrialde zoriontsuenetarikoa bilakatu dute.

Gaur egun, hainbat euskaldunek ikusten
dute bideragarri gure independentzia, beste
batzuk ordea arrisku itzela iragartzen dute
baina, nork ez luke nahi Finlandian lako
askatasuna eta ustelkeriarik eza gure Euskal
Herrirako? Guk zer gura dugu? Zeren beldur
gara?

Marisa Barrena psikopedagogoa da