Komentua itxi dute

Duela hilabete eta erdi okupatu zuten zenbait norbanakok Durangoko Salesen komentua izandakoa. Izaera eta helburu desberdinetako zenbait pertsona bildu ziren, herriarentzat herritik sortutako kezkei erantzuteko. Gune aske bat: bizitzeko, sortzeko eta lan egiteko. Hutsik zegoen eraikin bati bizia eman eta bide batez, beste guztioi ere bizia emango zigun proiektua zen.

Erakutsi da bat baino gehiago direla ???eta garela- proiektuak esku artean izan eta aurrera ateratzeko lekurik gabe gaudenak. Erakutsi da bat baino gehiago direla hutsik dauden etxebizitza eta espazioak Durangaldean (Atxondon okupatu berri den Barraskilore gunea kasu zein Pepe Otero Gotilioren bideoan https://www.youtube.com/watch?v=L92Iztvd8v8 ageri dena). Niri, kasu hauen aurrean galdera sorta datorkit burura.

Nori egiten dio kalte horrelako espazio bat okupatzeak? (Noski, jabeari, baina ze onura atera behar du abandonatuta dagoen lursail eta eraikin batetik? Lapurretak jasaten mantentzeko?). Urteetan geldi, hutsik eta alferrik galtzen egon den toki bat baino gehiago ditugu Durangon. Biziberritzeko ahalegin gutxi egin da horrelako tokiekin, eta biziberritzen saiatu direnean, asko izan dira erdi bidean gelditu diren eraikin eta etxeak. Konstruktorakoekin hitz egin da, Komentu Askea-ren proiektua ahal bezain baketsuen aurrera ateratzeko. Denontzako mesedegarri den aterabide bezala. Baina, noski, bakoitzak berea nahi, nahiz eta goroldioz eta itokinez betetako komentua izan. Horren aurrean zer egin behar dugu?

Etxerik gabe daude gazte zein heldu ugari. Hutsik ordea horma arte asko eta asko; usteltzen. Gogora dezagun, 946 eskari daudela Etxebide-ra (Eusko Jaurlaritza) bideratuta Durangon etxe bat lortzeko helburuarekin (aipatutako bideoan ikus daitekeen legez). Mila eta bat proiektu dauzkagu esku artean eta teilatu faltan, ametsak ere kendu nahi dizkigute.

Askok esango dute ez dela zilegi eta ez dela legala ondasun pribatu batera baimenik gabe sartu eta zure egitea. Baina zein da txanponaren beste aurpegia? Herritarron egonezinak, proiektuak, etxe bizitza baterako eskubideak, sortzeko eta elkarbanatzeko duintasuna, non daude? Iruditzen zait txanponaren beste aurpegi hori, Ertzaintzak egin duen itxierarekin, gehiago gorrituko dela. Honek guztionek justifikatzen du okupazio ekintza bat? Bakoitzak bere iritzia izango du, guztiz ulertzekoa. Baina ni, gaur, gazte eta sortzaile bezala minduta nago.

Argi dago San Fausto jai batzuen atarian egin zen aurrerapausua ez dela amildegira emandako pausuan geldituko. Ikusi baita badaudela eskuak, buruak eta batez ere bihotzak, behar duguna ???beharra baita- egiteko.

(Aspaldi ezer argitaratu gabe nengoen. Berriro ere martxan jarri naiz. Nahi duenak irakur dezala nahi duena.)