“Orain ere ez dira pasako!!!” dio Atxondoko AHT Gelditu! ekimenak

Atxondoko AHT Gelditu! plataformak Abiadura Handiko Trenaren kontrako iritzia berretsi du eta “duela 12 urte Atxondotik pasa ez ziren bezala, orain ere ez dira pasako!!” adierazi dute. Gainera, Udal berriak ahaztu duela herritarren gehiengoak proiektuari emandako ezetza diote.

Udal berriak “isilpean martxan jarri ditu garai batean gelditu izan ziren lan txikitzaileak” eta “azken asteotan informazio eske” joan diren herritarrak ez ditu asetu. Horregatik, eta herritarrak arduratuta daudelako, “Udalari argia izan dadila eskatu nahi diogu eta lanekiko egoera nola dagoen azaltzea”.

AHTa gauzatzeko lanen ondorioak “ez dira bere ibilbide soilean oinarritzen”, egitasmoa egiteko hainbat “sarbide berri, zubi, zabortegi, desjabetze eta lur mugimendu” egin behar direlako. Horrez gain, aipagarriak dira “eragin ahal dituen zaratak, aire kutsadura, lubiziak, herriaren erabateko zatiketa, …eta zer esanik ez suposatzen duen diru xahuketa”.

“Lurralde antolamenduan legearen kontra izandako jokabideak” salatzeaz gain, garraiobide hori gauzatzeak eragin zuzena izango du datozen belaunaldietan eta, etorkizunari begira, “garapen jasangarri batekiko apustua” egin nahi dutelako ageri dira AHTaren kontra. Izan ere, gizarte garatu baten lehentasuna “ingurumen osasuntsu eta bizi bat izan beharko litzateke”.

Aipaturiko arrazoi guzti horiengatik egunero Apatako plazan bilera irekiak egiten ari dira, arratsaldeko 19:00etan.

.