Topa eginez hasiko dituzte Mallabin Euskararen Eguneko ospakizunak

Mallabiko Udalak hainbat elkarterekin elkarlanean, ekitaldi erakargarriak prestatu ditu abenduaren 3rako, Euskararen Nazioarteko Eguna dela eta. Egitarauan hizkuntzaren aldeko topa, aizkolarien arteko lehiaketa eta profesionalen pilota partidak tartekatuko dira.

Prestatutako egitaraua eguerdiko 12:00etan abiatuko da Mallabiko plazan euskararen alde topa eginez. Herriko Berbalagunek herritar guztiak gonbidatzen ditu ekitaldi horretara, eta bertaratzen direnek txanpain kopa eta txorizo egosi pintxoa dastatzeko aukera izango dute.

Ordu erdi geroago Urrezko Aizkolarien Kopako norgehiagoka jokatuko da pilotalekuan. Ioritz Gisasola ‘Zelai IV’ mallabitarraz gain, Jokin Urretabizkaia ‘Basozabal’, Aritz Irazabal, Julen Larrea III, Hodei Ezpeleta, Ibai Soroa eta Joxean Etxebarria izango dira lehiakideak. Sarrera doakoa izango da.

Arratsaldeko 17:00etan binakako txapelketetako pilota partidak jokatuko dira Mallabia I pilotalekuan. Jaialdia Serie B Ligako norgehiagokarekin hasiko da, Salaberria-Arbizu eta Egiguren V-Eskurza bikoteak aurrez aurre izango direla. Bigarren partida LEP.M Ligakoa izango da eta Elordi mallabitarrak eta Rezusta bergararrak osatutako bikoteak Ezkurdia eta Tolosarekin indarrak neurtuko dituzte. Sarrerak www.entradasfronton.com webgunean eta egunean bertan txartel leihatilan erosi ahal izango dira.

Prestatutako ekitaldiekin “euskararen erabilera sustatzeko jarduerak egiten jarraitzea da, eta aldi berean gure kirolak balioan jartzea”, adierazi du Igor Agirre alkateak. Hori dela eta, “Zelai IV.a eta Elordi bezalako kirolari mallabitarrak ditugu”, azpimarratu du.