Durangoko Alpino Tabira mendi klubak ‘Durangaldeko gandorrak’ ekimenari eusten dio eta, ohiturari jarraituz, ibilaldi bat antolatu du urriko lehenengo domekarako, aurten 54. edizioa beteko dela.
2023ko ‘Durangaldeko gandorrak’ Udalatx mendizerran barrena burutuko da, antolatzaileek “bere hiru tontorrak” igotzea aukeratu baitute, “eta bueltako bidean Besaidera igotzeko aukera ere egongo da”.
Parte hartu nahi duten mendizaleek goizeko 8:00etan irtengo dira Durangoko Olleria kaletik, leku horretatik abiatuko baita Elorrioko Iguria auzoraino gerturatuko dituen autobusa. Antolatzaileek geltokian bertan banatuko dituzte parte hartze txartelak, 7:30etatik aurrera.
100 pertsona
Ibilbidea Arrazolako Topean amaituko da, non antolatzaileek hamaiketako txiki bat eskainiko dieten parte-hartzaileei. Handik, bakoitza bere kabuz itzuliko da Durangora, baina Alpino Tabiratik “Arrazolako elizatik orduero irteten den lineako autobusa” hartzea gomendatzen dute.
Parte hartu ahal izateko ezinbestekoa izango da mendian federatua egotea eta partaidetza 100 pertsonara mugatuta egongo da. Horrez gain, kontuan izan, ibilbidearen zati handi bat zoru irregularrean zehar doala eta ondorioz, oinetako egokiak eroan behar direla.
Elorrioko Iguria auzotik abiatuko den ibilbideak, Gongetako meatzeak zeharkatuko ditu, Atxaurrutxagane, Erdikoatxa eta Udalatx tontorretara heldu aurretik. Ondoren, Besaidera jaitsiko dira, Arrazolako Topera heldu aurretik. Ibilbideak 13 kilometro eta 1040 metroko desnibel metatua du.
Informazio gehiago Alpino Tabira mendi klubeko webgunean.
Cargando...
