XIX. eta XX. mendeetako lanbideak izango dute protagonismoa Antzinako Ogibideen Azokan

Elorrioko San Agustin Etxebarria elizatean egingo den Antzinako Ogibideen Azokak 9. edizioa beteko du zapatuan. Olazar Auzo Elkarteak antolatutako erakustaldia goizeko 11:00etan hasiko da eta bertan antzinako erara egindako pintxoak eta edariak dastatzeko aukera egongo da.

Aldez aurretik egindako edizioetan Erdi Aroko ofizioak nabarmendu badira, aurten Aro Modernoa gogoratuko dute, XIX. mende amaiera eta XX. mende hasieretako lanbideak izango baitute protagonismo nagusia.

Aspaldiko ofizioak gogoratuko dituzten artisauak bertaratzen badira ere, XX. mendearen hasieran argazkiak egiten zituen ‘minuteroa’; luthierra eta musika tresnak; josteko makinak eta sastreak; beira-putzegilea; arropa garbitzailea eta iraultza industrialeko makinaren bate ere ikusgai egongo dira.

Bidaiak diligentzian

Bertaratuko diren ogibideen arten Elorrioko plazatik San Agustin Etxebarrira bidaiak egingo dituen eta ikusgai egongo den diligentzia ere egongo da bertan. Bidaiatzeko sistema horren bidez “Elorrioko bainuetxeetara etortzen ziren ‘udatiarrak’ eta sasoia gogoratu nahi ditugu”, antolatzaileko kide baten arabera.

Beraiekin batera erremintariak, teilagileak zein zulogailua edo tornua bezalako makinak erakutsiko dira. Zorrotzailea, sasoi bateko inprenta eta tamaina handian egindako antzinako jokuekin jolasteko aukera ere egongo da.

13:00ak aldera erakusketan jarritako makinen eta ogibideen azalpena egongo da eta 15:00etatik aurrera bazkari herrikoia egongo da.

Antzinako ofizioen lehen edizioa 2003an egin zen “San Agustineko elizatearen 950. urtemuga  ospatzeko” asmoarekin eta harrezkero “bi urtetik behin ospatzen dugu” antolatzaileen esanetan. Parte-hartzaile gehienak auzotarrak eta elorriarrak badira ere, Arbaso artisauen elkartearen kolaborazioa zein Gaztelatik etorritako zenbait laguntzaile izango dituzte.