Zaldibarko udalekuetan izena emateko epea apirilaren 22an amaituko da

Zaldibarko Udalak ekainean eta uztailean egingo diren udalekuetan izena emateko epea ireki du. 2012 eta 2019 artean jaiotako umeei zuzendutako ekimenean parte hartzeko, izena eman daiteke apirilaren 22a arte Udal bulegoetan.

Udalekuak lau astez eskainiko dira aurten. Lehena ekainaren 24an hasiko da eta 28an amaituko da, eta gainontzeko hirurak uztailean izango dira, 1etik 4ra, 8tik 12ra eta 15etik 19ra, hurrenez hurren. Ordutegia 10:00etatik 14:00etara izango da.

Udalekuetako kuota 25 eurokoa izango da umeko eta asteko. Bigarren eta hirugarren umea inskribatzeagatiko kuota, aldiz, txikiagoa izango da, 12 eurokoa hain zuzen. Dirua Kutxabankeko kontu korrontean sartu behar da.

Udalekuez gainera, umeak zaintzeko zerbitzua ere eskainiko da 9:00etatik 10:00etara, astean 15 euroko gehigarria ordainduta. Interesdunek inskripzioa egiten duten unean eskatu beharko dute haurtzaindegi zerbitzua.

Aurten gehienez 125 haurrek parte hartu ahal izango dute, eta eskainitako plaza kopurua baino izen-emate gehiago egonez gero, Udalak zozketa bidez erabakiko ditu parte hartzaileak.