Zornotzako EH Bilduk “espazio publikoa arautuko duen ordenantza zerotik berregitea” eskatu dio Udal Gobernuari, aurreikusitako araudia “herritarrei bizkarra emanez” egin delako, “murriztailea” delako eta “erabaki asko alkatearen esku” uzten dituelako.
Udal Gobernuak proposatutako ordenantzari ekarpenak eta alegazioak aurkezteko epea aurreko astean amaitu zen, eta alderdi subiranistak “oso-osorik berregiteko eskaera” berretsi du.
Eskari hori “Zornotzako eragile ezberdinek egindako salaketa publikoak indartu egin du”. Jarrera hori kontuan hartuta, “Udal Gobernuak atzera egin behar du, eta hutsetik hasita, zornotzarron elkarbizitza arautuko duen ordenantza herritarren artean garatu ahal izateko prozezu parte-hartzaile bat abian jarri behar du, elkarte, eragile, ostalari, komertzio eta norbanakoen parte-hartzerako saio irekiak antolatuta”.
Zornotzako EH Bilduk formari zein edukiari buruzko ekarpenak eta alegazioa egin ditu. Formari dagokionez, ordenantzak ez dituenez jasotzen genero-inpaktuari edota arau-eraginaren azterketari buruzko memoriak, “ordenantza baliogabetzat jo daiteke”.
Edukiari dagokionez, euskararen inguruko irizpide faltaz gain, arbitrariotasuna murrizteko irizpideak ere eskatu ditu alderdi subiranistak, edota “baimena eskatzen duenari gehiegizko baldintzak edo betebeharrak ezarri ordez, erraztasunak ematea”. Gainera, “kaleko musikari eta ekitaldiei jartzen zaizkien debekuak eta oztopoak ezabatzea” eskatu dute.
Cargando...
